Sistema'l Cerru'l Cuevón del Trabe

Topografía

(- 1.589 m)


pica nella pa vela más grande
 
FONDURA: - 1.589 m
DESENDOLCU:   7.060 m

ALLUGAMIENTU: Cuetos del Trabe, Amuesa. Macizu Central (Los Urrieles). Picos d'Europa. Conceyu Cabrales. Asturies.

COORDENAES U.T.M.
Torca'l Cerru'l Cuevón del Trabe (T-33) X: 349,077
Y: 4.787,155
Z: 2.019 m.s.n.m.
Torca las Saxifragas (TR-2) X: 348,918
Y: 4.788,255
Z: 1.590 m.s.n.m.

PROTEICIÓN: Pendiente de declarción específica como Espaciu Natural Protexíu (ENP), sigún el Plan de Proteición de los Recursos Naturales d'Asturies (PORNA)

Incluyíu nel Parque Nacional de los Picos d'Europa.

Incluyíu nel Llugar d'Importancia Comunitaria de los Picos d'Europa y na Zona d'Especial Proteición pa les Aves de los Picos d'Europa (UE).

Incluyíu na Reserva la Biosfera de los Picos d'Europa (UNESCO).

Citada nel Plan Rector d'Usu y Xestión del Parque Nacional de los Picos d'Europa (PRUG). Anexu I.7: Relación de cavidaes y microglaciares de fondura o desnivel superior a los 300 m.

BIBLIOGRAFÍA: Genuite, Pat. Torca del Cerro. Picos de Europa. Macizo Central. Asturias. Ed. Speleo Club de la Seine. Paris, 1998.
Puch, Carlos. Grandes Cuevas y Simas de España. Ed. Espeleo Club de Gràcia. Barcelona, 1998.
Puch, Carlos. Subterránea nº 17. Ed. Federación Española de Espeleología. Madrid, 2002.

pica nes semeyes pa veles más grandes

Allugamientu:

La Torca'l Cerru'l Cuevón del Trabe (T-33), ábrese 150 metros al Noreste'l Cuevón del Trabe, muncho bien visible dende la Cuesta'l Trabe. La Torca las Saxifragas (TR-2), allúgase na zona inferior la Cuesta'l Trabe, escomanáu escar allugáu ente la Mayada d'Amuesa y los Cuetos del Trabe; ábrese nel exe un suave talweg, 400 metros al SSO del Llagu d'Amuesa.

Para llegar a elles, hai que dexar el senderu que va d'Amuesa al H.ou de los Cabrones, a 1.950 m. d'altor, nel llugar en que s'atraviesa per unes llambries. Darréu, asciéndese pa contra'l SO unos 70 m, per una cuesta, hasta que cambia la pendiente. Les dos entradines, separaes 13 m una d'otra, atópense nún escar perpindiu, tres d'una depresión de 5x10m, allugada nel mesmu cambiu de pendiente.

L'accesu hasta Amuesa (1.367 m) faise dende la Ponte Poncebos, pela Ponte la H.aya hasta Bulnes (anguaño podemos llegar a esti pueblu en funicular). En Bulnes d'Arriba (712 m), gárrase la Canal d'Amuesa, empobinándose ún p'hacia la mayada del mesmu nome.

Les agües drenaes por tou esti seutor de los Cuetos del Trabe-Amuesa (seutor noroeste del Macizu central de los Picos d'Europa), surden a nivel del Ríu Cares na impresionante surdencia del Farfáu la Viña, allugada na so oriella derecha.

Hestoria de les esploraciones

Los trabayos nel seutor de los Cuetos del Trabe y Amuesa (Macizu Central de los Picos d'Europa) fueron desendolcaos na década de 1980 pol Spéléo Club de la Seine (Paris). Más sero, estos trabayos fueron continuaos na década de 1990 polos interclubes Cocktail Picos (Paris) ya Interclub Espeleo Valencianu (Valencia), andechando xuntos na esploración d'esta cavidá fasta algamar los -1.589 m de fondura nel añu 1998.

Descripción

A la cavidá accédese per dos boques pequeñes, peraveraes. Nos sos primeros metros, atópense grandes sales y abondos pozos y esguilaes (un total de 110 m d'ascensos). A partir de -120 m, la torca desendólcase en pozos meandriformes, garrando fondura muncho bien rápido. A -286 m, ábrense dos víes estremaes, que vuelven xunise 86 m más abaxu nuna sala con formaciones de barru fósil. Un pasu ente bloques comunica con un pozu que bifurca nuna vía activa y otra inactiva. Dambes dos, vuelven xuntase a -545 m ("Sala del Conciliábulo"). Una sucesión de meandros retorcíos y pocinos empobina fasta la "Sala de la bolsa Fantasma" (-721 m), la cual da pasu per una curtia esguilada a un impresionante P 95 m ("Pozo MOC"). De magar esti puntu, les dimensiones la cavidá engrándense. A -950 m, apórtase a la "Sala Zepafini", que no fondero d'ella desúmese'l cursu activu. Tres dellos pozos y meandros secos, apórtase a una nueva sala ("Sala Olvidar") a -1165 m. La única continuación ye una estrenchura que precede a dellos pocinos y meandros que desemboquen nuna vertical de 120 m, au reapruz el cursu activu otra vuelta. Un nuevu pozu de 134 m allúganos na cabecera d'una vertical de 20 m a la cota -1400 m, per onde circula una forte corriente d'aire. Nel pozu de 134 m, a los 111 m de la cabecera, arranca una galería cortada por un P 15 y un P 29, que conduz dica un regueru ("Ríu Marbregalo"). Agües abaxu, el ríu interrumpíu por un pasaxe cuasi somorguiáu desemboca nel últimu pozu de 70 m, ya cerca'l sifón terminal, a -1589 m de fondura.


Más información en:

http://www.fedespeleo.com/web/paginas/Cavidades/1000/cerro.htm
Decretu 38/1994 del Principáu d'Asturies, de 19 de mayu, qu'aprueba'l Plan d'Ordenación de los recursos naturales del Principáu
Llei 16/1995, de 30 de mayu, de declaración del Parque Nacional de los Picos d'Europa
RD 384/2002, de 26 d'abril, pol que s'aprueba'l Plan Rector d'Usu y Xestión del Parque Nacional de los Picos d'Europa

 

Los Cuetos del Trabe. Macizu Central de los Picos d'Europa

Surdencia del Farfáu la Viña, na oriella derecha del ríu Cares

T-33. Boca d'entrada

T-33. "Pozo del Pitón": cabecera

TR-2. No fondero'l pozu d'entrada. Semeya: V. Biot, Cocktail Picos (2000) 

 
   
   
   
enlace con la página espeleoastur.as