Torca Idoúbeda

Topografía

(- 1.167 m)


pica nella pa vela más grande
 
FONDURA: - 1.167 m
DESENDOLCU:   2.286 m

ALLUGAMIENTU: Canal del Picu Albu. Macizu Central (Los Urrieles). Picos d'Europa. Conceyu Cabrales. Asturies.

COORDENAES U.T.M.
56 X: 350,052
Y: 4.787,154
Z: 1.856 m.s.n.m.

PROTEICIÓN: Pendiente de declarción específica como Espaciu Natural Protexíu (ENP), sigún el Plan de Proteición de los Recursos Naturales d'Asturies (PORNA)

Incluyida nel Parque Nacional de los Picos d'Europa.

Incluyida nel Llugar d'Importancia Comunitaria de los Picos d'Europa y na Zona d'Especial Proteición pa les Aves de los Picos d'Europa (UE).

Incluyida na Reserva la Biosfera de los Picos d'Europa (UNESCO).

Citada nel Plan Rector d'Usu y Xestión del Parque Nacional de los Picos d'Europa (PRUG). Anexu I.7: Relación de cavidaes y microglaciares de fondura o desnivel superior a los 300 m.

BIBLIOGRAFÍA: Puch, Carlos. Grandes Cuevas y Simas de España. Ed. Espeleo Club de Gràcia. Barcelona, 1998.
Puch, Carlos. Subterránea nº 17. Ed. Federación Española de Espeleología. Madrid, 2002.

pica nes semeyes pa veles más grandes

Allugamientu:

Diendo pel senderu que va dende Amuesa al H.ou de los Cabrones, abandónase na Cuesta'l Trabe, unos 300 m anantia'l so final pa, darréu, empobinar pa contra'l SE travesando un escomanáu escar, llegando asina a la canalona qu'hai ente'l Picu Albu les aguyes Tesresita y Mª Rosario. Al principiu la canal, hai una llaguna estacional a 1.820 m d'altor. Subiendo pela canal, llégase a la boca la torca, allugada al pie d'un paré, a 3 m del suelu, a la manderecha la canal y a unos 150 m del principiu d'esta.

Les agües drenaes por tou esti seutor de los Cuetos del Trabe-Amuesa (seutor noroeste del Macizu central de los Picos d'Europa), surden a nivel del Ríu Cares na impresionante surdencia del Farfáu la Viña, allugada na so oriella derecha.

Hestoria de les esploraciones

Los trabayos nel seutor de los Cuetos del Trabe y Amuesa (Macizu Central de los Picos d'Europa) fueron desendolcaos na década de 1980 pol Spéléo Club de la Seine (Paris). Más sero, estos trabayos fueron continuaos na década de 1990 polos interclubes Cocktail Picos (Paris) ya Interclub Espeleo Valencianu (Valencia).

Descripción

Pela boca la torca, de 0,5 x 8 m, sopla una fuerte corriente d'aire fríu. L'accesu ye un P 72 ampliu y fraccionáu. Yá no fondero y en direición N, arranca un meandru de 150 m ("El Metro") con dellos pasos estrechos. A -190 m, entama una vía qu'arranca nún pozu de 30 m, seguíu d'abondos pozos activos. Llégase asina una sala ("Kiko Picao"), a -324 m de fondura, a la qu'aporta un bon regueru per arriba. La continuación ye más vertical (P 9, P 40, P 26, P 65 y P 74 m). A -542 m de fondura, desúmese l'agua ente costeros. Depués d'un pasamanos a 20 m de lo más fondero, algámase la espalda'l cabalgamientu, inclináu 45º. La progresión faise entós per una serie pozos inactivos, ente ellos ún de 63 m. La continuación ye más o menos activa y desemboca na sala "Marie-Anne", a -880 m. Una galería conduz a un pozu de 62 m seguíu d'otra galería y un P 92. A partir d'equí, la torca cambia de direición y de morfoloxía. La continuación ye estrecha, húmeda y cola roca inestable y orientada por fractures. Lo fondero'l caberu pozu de 15 m, ye una estrenchura semisomorguiada ("El Karcher") per onde desúmese l'agua, a -1.167 m. Nun ye descartable una posible xunión col Sistema'l Trabe a -950 m, a la vista la punta d'esploración algamada nesta cavidá.


Más información en:

http://www.fedespeleo.com/web/paginas/Cavidades/1000/idoubeda.htm
Decretu 38/1994 del Principáu d'Asturies, de 19 de mayu, qu'aprueba'l Plan d'Ordenación de los recursos naturales del Principáu
Llei 16/1995, de 30 de mayu, de declaración del Parque Nacional de los Picos d'Europa
RD 384/2002, de 26 d'abril, pol que s'aprueba'l Plan Rector d'Usu y Xestión del Parque Nacional de los Picos d'Europa

 

Los Cuetos del Trabe. Macizu Central de los Picos d'Europa

Surdencia del Farfáu la Viña, na oriella derecha del ríu Cares

L'escomanáu escar so los Cuetos del Trabe. Semeya: V. Biot, Cocktail Picos (2000)

La entrada la Torca Idóubeda. Semeya: V. Biot, Cocktail Picos (2000)

Pozu na Torca Idoúbeda

Progresando pela Torca Idoúbeda

 
   
   
   
enlace con la página espeleoastur.as