Torca'l Madeh.unu

Topografía

(- 1.252 m)


pica nella pa vela más grande
 
FONDURA: - 1.252 m
DESENDOLCU:   2.853 m

ALLUGAMIENTU: Madeh.unu - Tiru Llagu. Macizu Central (Los Urrieles). Picos d'Europa. Conceyu de Posada de Valdión. Lleón.

COORDENAES U.T.M.
Torca'l Madeh.unu (d45) X: 350,160
Y: 4.781,350
Z: 2.425 m.s.n.m.

PROTEICIÓN:

Incluyida nel Parque Nacional de los Picos d'Europa.

Incluyida nel Llugar d'Importancia Comunitaria de los Picos d'Europa y na Zona d'Especial Proteición pa les Aves de los Picos d'Europa (UE).

Incluyida na Reserva la Biosfera de los Picos d'Europa (UNESCO).

Citada nel Plan Rector d'Usu y Xestión del Parque Nacional de los Picos d'Europa (PRUG). Anexu I.7: Relación de cavidaes y microglaciares de fondura o desnivel superior a los 300 m.

BIBLIOGRAFÍA: Puch, Carlos. Grandes Cuevas y Simas de España. Ed. Espeleo Club de Gràcia. Barcelona, 1998.
Puch, Carlos. Subterránea nº 17. Ed. Federación Española de Espeleología. Madrid, 2002.

pica nes semeyes pa veles más grandes

Allugamientu:

La boca d'entrada ábrese nel anfiteatru noroccidental del H.oyu'l Sedo, perbaxu la cresta'l Tiru Llagu al Madeh.unu. P'aportar fasta ella gárrase en Fuente Dé, el teleféricu fasta'l miradoriu'l Cable (1.834 m). Dende ellí, gárrase'l camín que pasa pelos H.oyos de Lloroza y qu'empobina al H.oyu Escuru, al Oeste. Más alantre allúgase'l H.oyu'l Sedo. Hai que subir pela cuesta pa contra'l NO, en direición a la Torre'l H.oyu'l Sedo. La torca ábrese al pie d'un  costerón, a 2.425 m d'altor.

Hestoria de les esploraciones

Los trabayos nel seutor del H.oyu'l Sedo (Macizu Central de los Picos d'Europa) fueron entamaos na década de 1980 por equipos del Lancaster University Speleological Society (LUSS) y el tamién británicu LPCC; más sero, na década de 1990, los trabayos desendolcáronse al traviés d'un interclub nel qu'andecharon xuntos espeleólogos británicos, belgas y españoles: el "Proyecto Llambrión".

Descripción

Una serie pocinos, escavaos a favor d'una fractura ribayosa, conduz a un culu sacu a -97 m. A -72 m, abre una ventana que dexa continuar la esploración a lo llargo una sucesión de tres pozos. No fondero'l caberu (P 23 m), foi necesario abrise pasu ente los costeros pa seguir. La rede saltos que vien darréu acaba nún estrechamientu la fractura, a - 242 m. Pero una esguilada de 10 m val p'aportar al testeru d'un pozu de 134 m ("Pozo Rey Triste"), al que siguen otros dos consecutivos. A -414 m, apruz el primer afluente y se mete per un meandru, anantia desumise y obligar a los esploradores a esguilar p'avanzar fasta la siguiente serie de verticales dica los -500 m. Un poco más alantre, apórtase al vivac del añu 1994, que precede al escomanáu pozu de 165 m ("Pozo Nublado"). Vienen darréu dellos  saltos verticales estrechos, a los que sigue un llargu y estrechu meandru cásique horizontal. Dellos pozos parten esti meandru, anantia aportar al testeru d'un P 75 m, aeriu. Dende esti puntu a -905 m, apórtase bien ceo al colector. A -1.160 m, no fondero un P 20 m, apórtase a una sala con una estrecha regalla que canaliza tol caudal del ríu. Una y bones superada la resquiebra, báxense delles verticales más, fasta que no fondero la cabera d'elles, un perguapu pozu de 32 m con tombayón, allúgase'l sifón terminal a -1.252 m de fondura.


Más información en:

http://www.fedespeleo.com/web/paginas/Cavidades/1000/madejuno.htm
Decretu 38/1994 del Principáu d'Asturies, de 19 de mayu, qu'aprueba'l Plan d'Ordenación de los recursos naturales del Principáu
Llei 16/1995, de 30 de mayu, de declaración del Parque Nacional de los Picos d'Europa
RD 384/2002, de 26 d'abril, pol que s'aprueba'l Plan Rector d'Usu y Xestión del Parque Nacional de los Picos d'Europa

 

El seutor Mede.hunu - Llambrión. Macizu Central de los Picos d'Europa. Los cumales del grupu del Llambrión percima'l H.oyu los Llagos (manzorga), Tiru Llagu (centru), Madeh.unu sobre'l H.oyu'l Sedo (manderecha) y la Vega de Liordes (derecha, abaxu). Semeya: Pedro Yubero Rivas

Na Torca'l Madeh.unu. Semeya: Tim Nichols

 
   
   
   
enlace con la página espeleoastur.as