Torca los Rebecos

Topografía

(- 1.255 m)


pica nella pa vela más grande
 
FONDURA: - 1.255 m
DESENDOLCU:   2.228 m

ALLUGAMIENTU: Cuetos del Trabe, Amuesa. Macizu Central (Los Urrieles). Picos d'Europa. Conceyu Cabrales. Asturies.

COORDENAES U.T.M.
Torca los Rebecos (T-27) X: 349,229
Y: 4.786,812
Z: 2.083 m.s.n.m.

PROTEICIÓN: Pendiente de declarción específica como Espaciu Natural Protexíu (ENP), sigún el Plan de Proteición de los Recursos Naturales d'Asturies (PORNA)

Incluyida nel Parque Nacional de los Picos d'Europa.

Incluyida nel Llugar d'Importancia Comunitaria de los Picos d'Europa y na Zona d'Especial Proteición pa les Aves de los Picos d'Europa (UE).

Incluyida na Reserva la Biosfera de los Picos d'Europa (UNESCO).

Citada nel Plan Rector d'Usu y Xestión del Parque Nacional de los Picos d'Europa (PRUG). Anexu I.7: Relación de cavidaes y microglaciares de fondura o desnivel superior a los 300 m.

BIBLIOGRAFÍA: Puch, Carlos. Grandes Cuevas y Simas de España. Ed. Espeleo Club de Gràcia. Barcelona, 1998.
Puch, Carlos. Subterránea nº 17. Ed. Federación Española de Espeleología. Madrid, 2002.

pica nes semeyes pa veles más grandes

Allugamientu:

Allúgase esta cavidá nos Cuetos del Trave, no fondero d'un h.ou grande, a manderecha'l camín qu'empobina al refuxu "Jose Ramón Lueje". Accédese a ella dende la Ponte Poncebos (250 m), pela Ponte la H.aya, subiendo al pueblu de Bulnes (anguaño accesible mediante funicular soterrañu). En Bulnes d'Arriba (712 m), gárrase la Canal d'Amuesa, empobinando p'hacia la mayada del mesmu nome (1.367 m). Una y bones nel Colláu de Cima (1.386 m), hai que tirar pa contra'l S pelos pindios praos de la Cuesta'l Trabe. Hacia la cota 1.900 m , yá al pie la torre piramidal del Cuetu'l Trabe (2.237 m), apórtase al escar. El camín tira pa contra'l SE pente peñeos y dalgún qu'otru h.ou, subiendo hasta'l refuxu "José Ramón Lueje". Pasáu'l colláu, penriba les boques superiores del Sistema'l Trabe y a la manderecha, topamos el h.ou col so gran neveru, nel que s'alluga la boca la torca.

Les agües drenaes por tou esti seutor de los Cuetos del Trabe-Amuesa (seutor noroeste del Macizu central de los Picos d'Europa), surden a nivel del Ríu Cares na impresionante surdencia del Farfáu la Viña, allugada na so oriella derecha.

Hestoria de les esploraciones

Los trabayos nel seutor de los Cuetos del Trabe y Amuesa (Macizu Central de los Picos d'Europa) fueron desendolcaos na década de 1980 pol Spéléo Club de la Seine (Paris). Más sero, estos trabayos fueron continuaos na década de 1990 polos interclubes Cocktail Picos (Paris) ya Interclub Espeleo Valencianu (Valencia).

Descripción

La torca ábrese no fondero'l h.ou, au s'atopa un neverón que la tapez davezu. Abriendo pasu na rimaya, apórtase a la entrada, un estrenchu meandru ("La sardina") que precede al P 219 m. No fondero d'esti, otru meandru desemboca direuto enriba un pozu aeriu de 59 m, al que siguen  ún de 51 m y otru de 19 m, dambos dos bien regaos. El pozu viniente (14 m) lleva una decena metros más p'alantre, a la cabecera d'un perguapu P 165 m ("TGV"). El siguiente P 91 m, ye más complicáu d'instalar, pola mor d'un derrabe costeros inestables nel so testeru. Otra serie pozos, ente ellos ún de 57 m, aporta fasta'l vivac a -900 m, nún meandru activu ente dos pozos. La continuación ye más difícil y obligó a los esploradores a facer delles travesíes y desobstrucciones, hasta algamar un meandru de 120 m, siguíu de la cabera serie de pozos qu'empobinen al sifón terminal.


Más información en:

http://www.fedespeleo.com/web/paginas/Cavidades/1000/rebecos.htm
Decretu 38/1994 del Principáu d'Asturies, de 19 de mayu, qu'aprueba'l Plan d'Ordenación de los recursos naturales del Principáu
Llei 16/1995, de 30 de mayu, de declaración del Parque Nacional de los Picos d'Europa
RD 384/2002, de 26 d'abril, pol que s'aprueba'l Plan Rector d'Usu y Xestión del Parque Nacional de los Picos d'Europa

 

Los Cuetos del Trabe. Macizu Central de los Picos d'Europa

Surdencia del Farfáu la Viña, na oriella derecha del ríu Cares

La Cuesta'l Trabe dende'l Colláu de Cima, Amuesa. Macizu Central de Picos d'Europa. Semeya: Carlos González Paniagua

 
   
   
   
enlace con la página espeleoastur.as