Cova d’Algarinho
Serra de Sicó, Concelho de Penela - Portugal 
 
 
 
 

El motivu que nos fizo planteganos una xera en Portugal foi la perbona rellación col Nucleo d’Espeleoloxia de Condeixa. Esti grupu lleva faciendo espediciones a Asturies dende 1996, visitando delles cavidaes nos conceyos de Teberga, Yernes y Tameza, Llanes y Ribeseya. Tamién andecharon esti añu na Campaña Castil 98, destacando na esploración de la Torca la Peña Carbonal, de 480 m. de fondura.

Na primavera de 1997, Marife y Teca visiten la entrada de la surdencia de Olhos d’Agua d’Alviela, el sifón más fonderu de la Península Ibérica, -101 m. de fondura esploraos en 1987 pel S.C.de Dijon. Tamién entren en contaútu cola xente del N.E.C., percorriendo con ellos les estribaciones de la Serra de Sicó.

Na seronda de 1998 plantegase por fin el viaxe a Portugal. L’oxetivu plantegau ye’l merguyu del sifón terminal de la Cova d’Algarinho, facer una proyeción de diapositives sobre les campañes en Torca Castil en 1997 y 1998, y un reconocimientu rápido de la surdencia de Olhos d’Agua d’Ançós, sifón esplorau tamién en 1983 pel S.C. de Dijon fasta -63 m. de fondura. Les feches escoyides pa la espedición foron 4,5,6,7 y 8 d’Avientu de 1998.

Tres un viaxe de más de 9 hores llegamos a Condeixa-a-Nova a les 23’45 de la nueche (hora portuguesa). Condeixa-a-Nova ye una pequeña villa averada a Coimbra y ye cabeza del conceyu del mesmu nome. Dista 14 km. de Coimbra y lo más destacable del llugar, aparte de la amabilidá de la so xente, son les ruines de la ciodá romana de Conímbriga. Axuntámonos cola xente del N.E.C. y dempués de los saludos de costume entamamos a plantegar la xera de los dies siguientes. Abelluguen-nos nel Albergue de Rabaçal, nel Concelho de Penela. Magar que ellos insisten que ye un albergue, tien la suficiente calidá pa consideralu un hotel. Unes cerveces nel chigre l’albergue valen pa planiar la xera del prósimu dia : percorriu de la Serra de Sicó.

Alborez un dia soleyeru pero friu. La xelada de la nuechi anterior fizo baxar el termómetru perbaxu de -5º C, pero l’almuerzu serviu pelos Srs. Bettini, los amos del albergue, fainos escaecer la temperatura. Colamos a visitar la Serra de Sicó. Esta xerra llevántase nel Concelho de Penela. Ye enteramente caliar y debuxa un relieve redondeau nel horizonte. El cumal más cimeru de la xerra tien daqué más de 500 m.s.n.m. Ye destacable la bayura d’olivos que, xunto cola lluz esplandeciente y clara que tóo lo arrodia, remémbranos los paisaxes mediterraneos. Ceu llegamos al Vale das Buracas , un barrancu caliar que al facese cortó delles galeries que anguañu son grandes abeyos y pequeñes cueves. La horizontalidá de les capes caliares y lo achatao del relieve asemeya esta fastera al norte de Burgos. Comemos en Penela, al llau del Castelo, realmente impresionante poles defenses y muries que inda tien de pié y dempués vamos a ver el Vale dos Polhos, otru barrancu nel que s’atopen dalgunes surdencies ente costeros. D’equí pasamos per Olhos d’Agua d’Anços. L’agua sal d’una cueva y embálsase nún banzao pa empobinala a un molín cercanu. Apreciase que l’agua sal limpio y podemos ver el fondu claramente. Apetez metese. Atapez y entama a xelar otra vegada, asina que volvemos a Condeixa-a-Nova, onde la xente del N.E.C. tien preparao nel so local una parrillada de carne, chorizos y morcielles, acompangao de sopa de grelos y con vinho y cerveza asgaya.

Más tarde facemos la proyeición de diapositives, con gran asistencia de público. Mentantu la nuesa presentación entregamos al Nucleo d’Espeleoloxia de Condeixa una estela de barru cociu con un tetrasquel grabau y el nome del G.E.G.

Dempués de la nuesa proyeición, el Nucleo d’Espeleoloxia de Condeixa presenta un reportaxe filmau por la Televisión Portuguesa sobre la Rede Vaçea-Douca, rede de galeries asitiada na Serra de Sicó que puede llegar a ser la mayor cavidá soterraña de Portugal. Pa facer medrar el desendolcu d’esta rede tan recurriendo a toles téuniques d’esploración, espeleomerguyu, esguilaes, vaciao de sifones y , como dicen ellos, “leves e discretas desobstruçaos”. El reportaxe tien calidá y camentamos que da una idega de la espeleoloxia portuguesa d’anguañu, que nun tien un res qu’envidiar a la que se fai al otru llau de la llende. Dempués continuamos l’alderique nel chigre de costume delantre delles cerveces.

El domingu 6 ye dia de xera. Javier, Merche, Marife y Rocio colen a dar una vuelta a Coimbra y el restu esperamos que nos vengan a buscar pa dir a la cueva. Magar que llevantamonos ceu nun entamamos a furrular fasta más p’allá de les 11’00. En pocos minutos de coche llegamos a la entrada de la cueva nomada Nascente d’Algarinho . Esta abrese peraverada a Penela en medio d’unos olivares y podemos ver lo que entienden los nuesos collacios portugueses por “uma leve e discreta desobstruçao”. Parez ser que ú güei ye la entrada nun hebia más que un furaquín que chaba agua n’époques de grandes xorrecies. Pa ver si hebia galeria penetrable perbaxu usaron una escarvadora con retrovato y escarvaron una carrilera de más de 20 m. de llargor y al final un pozu de 3 m. de fondo fasta dar al techu la galeria. Esto valió p’atopar una rede de galeries de dalgo más de 2.000 m. de desendolcu.

Organicense dos equipos d’esploración; Delri y Sinu van con algunos portugueses (Nuno y Samuel) a facer unes esguilaes y Trubia, Isidro, Raul y Teca, xunto con otru equipu portugués (Miguel Castela, Tiago y Ana Teresa) intentarán merguyar nel sifón terminal. Otru equipo portugués (Miguel Pessoa, Ana Luisa y Pinto) van topografiar la rede de resquiebres que furrulen de sumidorios temporiegos.

La entrada ye un cortu llaminador que sopla y sal a una galeria de techu baxu pero cómoda de caleyar. Ceu les dimensiones enanchen, tando la galeria torgada n’algunos llugares per pindios llaminadores de sable que nel so fondu lleguen a sifonar cuando xube’l nivel de l’agua. Nun hai galeries actives pero si abondos resclavos d’inundación, la repla tapez les paredes de les galeries y n’algunos llugares onde hai agua, esta camudase nún fluidu espesu ú fundímonos fasta les zanques. Delri y Sinu quedense a unos 700 m. de la entrada pa esguilar a la gueta d’unes galeries cimeres y el equipo de merguyu seguimos fasta el sifón, inda a más de 1.000 m. de distancia. Nes prosimidaes del sifón ye onde entá hai más repla. Una pindia rampla de sable gordo que parez que continua baxu l’agua ye lo que hai enantes del sifón. L’agua ye nidia y vese’l fondu de sable baxu l’agua.

Demientres Teca prepárase van desumiendose les coses ente’l sable...¡fasta les aletes sapócense nel sable llandio!. A la mandrecha’l charcu ta amarrau’l filu del merguyador portugués que somorguiose enantes de nos. Ye un filu que abultanos enforma finu pa merguyar n’agües veyaes, solo 3 mm. de diámetru y de color blancu. Teca atopa un bon amarre pa’l so filu y somorguiase nel agua col filu portugués na mandrecha y el carrete na manzorga. A los pocos segundos, un argayu de sable tapez el llaminador nel que se camuda la galeria somorguiada. L’agua veyase del tóo y tien que recurrir al palpu pa intentar atopar el pasu. Dempués d’unos menutos d’inmersión ensin atopar pasu, ya que parez que’l llaminador ta enllenu sable, sal a la superficie a esperar que pose la basa y ameyoren les condiciones de visibilidá. Vuelve a intentalo dempués d’un tiempu y avanza unos dalgunos metros nel llaminador ensin visibilidá dala. Esta vegada la inmersión dura dalgunos menutos más pero el sentiu común failu retornar a la superficie. Si hai pasu esti nun ye’l meyor dia pa guetalu.

Entamamos a salir de la cueva y aprovechamos pa facer delles semeyes. La cavidá ta contaminada porque enriba d’ella hai una planta d’alquitran, asina que peles galeries atopense dellos depósitos de galipota. Llegamos al esterior a les 10 de la nueche, en mediu d’una desmanada xelada, que fainos ver como la cueva esnelda. 20º C estremen la temperatura esterior (-10 º C ) de la de la cueva.

Les esguilaes feches por Sinu, Delri, Samuel y Nuno algamaron unes galeries cimeres con poques posibilidaes de continuación. Na furgoneta esperanos una caxa cerveza y delles botelles de vinho do Porto que valen pa calecenos un poco mientres llegamos al albergue. Equí prepárase una folixa fasta más de les 5 la mañana cola sabrosiega cena que nos prepararon nel albergue.

El llunes alborez otru dia lluminosu. El plan ye visitar les ruines romanes de la Vila Romana de Rabaçal y Conímbriga. Como les ruines de Rabaçal tan cerraes vamos derechos a Conímbriga. Magar que los arqueólogos solo tienen escarvao un 10% de les ruines, atalanten que tien unha estensión mayor que la de Mérida. Consérvase perbien la muralla y dellos mosaicos de les cases que formaben la ciudá.

Dempués de comer en Conímbriga dixebrámonos en dos grupos. Javier, Teca, Ana Teresa, Samuel y Tiago van a Olhos d’Agua d’Anços pa facer un somorgamientu de reconocimientu y aprovechar pa llimpiar de repla el material usau ayeri n’Algarinho. Prepárase Teca y Javier pon un petu p’asistilu na boca’l sifón y facer dalgunes semeyes. L’agua ye como la xinebra y ta caliente ¡¡18º C !!. Nun hai sifones asina n’Asturies. Les paredes somorguiaes ta atormentaes pola corrosión y dalgunes partes corten como navayes. El filu montau ye igual que’l d’ayeri n’Algarinho pero equí l’agua nun tien problema. Teca baxa fasta 9 m.de fondura, al entamu d’una galeria horizontal. Equi tien problemes pa compensar los oidos y tien que subir. Pero lo principal ya ta visto y ye que paga la pena volver a esta cueva pa merguyar n’ella.

Pela nuechi facemos la cena de despedia con bacalao asgaya, vino y cerveza. La pena ye que la sidre que traximos dende Asturies nun se podía beber por mor de lo frio que taba. La sidre cuando s’escancia a temperatures perbaxu ceru pierde’l sabor.

Al dia siguiente salimos de Condeixa en direición a Asturies a les 12 la mañana (hora portuguesa). Enantes de colar, quedamos en que tienen que devolvenos la visita na prósima selmana santa y nel mes d’Agostu p’andechar con nos na Campaña Castil 99.

L’afán d’esploración na espeloloxia d’esta xente del N.E.C. , xunto cola so amabilidá y caballerosidá, tan propia de los portugueses, faen que seyan un viveru d’esploradores de lo desconocio, que ensín llugar a dubies ya tienen un llugar na hestoria de la espeleoloxia nos Picos d’Europa, como los sos antiguos tuvieronlu na hestoria de la esploración de mares desconocios y llonxanos cuando entá quedaben espacios candes nes cartes de los mareantes. Contamos con ellos.

Andechiegos:
Isidro Baides Morente.................................G.E. Gorfolí ( Asturies )
Jesús Fernando Manteca Fraile (Teca).........G.E. Gorfolí ( Asturies )
José Luis del Rio Fernández ( Delri)............G.E. Gorfolí ( Asturies )
Fernando Alvarez Arias (Trubia).................G.E. Gorfolí ( Asturies )
Marifé Perez Gimeno..................................G.E. Gorfolí ( Asturies )
Raul Agüero Encuentra...............................G.E. Gorfolí ( Asturies )
Rocío Martinez Suarez................................G.E. Gorfolí ( Asturies )
Jesús Javier Lusarreta Fernández.................C.D.U. San Gregorio ( Asturies )
Mercedes Hernando Hernando....................S.E. Lenar ( Cantabria )
Sinué Sainz-Calderón ( Sinu)......................S.E. Lenar ( Cantabria )


Grupo d’Espeleoloxia Gorfolí
10 de Xineru de 1999

 

 

 

 

 

más información:

>> en la página del NEC

 
     
  enlace con la página espeleoastur.as