Resume de los trabayos desendolcaos mentantu l'añu 2003

GE Gorfolí (Asturies)

Cueva’l Pixuacu (Conceyu de Ribeseya)

Foi esplorada nos años 70 por grupos británicos. En 1999, y por encargu del G.E. Gorfolí, los espeleos portugueses del Nucleo de Espeleologia de Condeixa topografíen la cavidá. Mentantu xineru y febreru de 2003, equípase la cavidá pa merguyar nel sifón. Isidro, Oscár y Juanjo, sofitaos por Irene, Delri y Teca, esploren dellos metros de llargor fasta 18 de fondura col agua veyao. El difícil accesu a la cueva queda instaláu pa prósimes vegaes. Lo que ta nidio ye que’l ríu que surde nesta cueva ye un caudal estremáu del que percuerre la Cueva’l Tinganón y la Rede Conegra- Pozu les Cárcubes.

Fontona de les Foces (Conceyu d’Ayer)

13 de Xunetu de 2003.

Isidro y Oscár, sofitaos por Teca, esploren más de 100 m. en dos galeríes nel interior d’esti fontán. L’agua véyase daqué pero llimpia pronto. Dempués, Teca entra a topografiar, pero la rotura la mázcara fai que se retire a les poques decenes de metros con gran incomodidá.

Fonte Obaya (Conceyu de Colunga)

10 d’Agostu de 2003.

Javier y Teca, sofitaos por Merche, Juanjo y Oscár revisen la istalación de la galería principal dica -35 m. de fondura. El material foi carretáu el día anterior col sofitu l’equipu francés de la FFESSM. La llinia ta rota al principiu pero na galería solo fai falta amarrar dellos fraccionamientos. Na Galería de Xuan Pelos parez que nun hai llinia, pero Juanjo anecia en que la dexaron puesta. Na mecedura ente la galería principal y la de Xuan Pelos apruz otru tínganu somorguiáu que Teca sigue dica ver l’espeyu d’una campana. Les burbuyes faen cayer barru de les paredes y Teca torna a la principal ensin surdir a la campana.

Hai un fuerte vientu pela galería y parez venir d’una chimenea penriba la poza’l sifón.

31 d’Agostu de 2003.

Teca, sofitáu por Franón, Irene y Del Río, explora la galería atopada el día 10 y esta vuelta sal a una estrencha campana, pero nun sabe en que llugar de la galería. L’agua véyase enforma nesti tínganu. Dempués percuerre la Galería de Xuan Pelos, atopando dempués d’una decena metros la llinia vieya. Ta bien instalada y amiya per ella dica 18 m. de fondura. Dellos problemes cola llibreta faen que nun seya posible facer topo.

Franón y Del Río esguilen unos metros dica ver qu’hai una galería en rampla per onde vien l’aire. Meten un par de spits, pero al nun tener un material mas afayadizu, tienen que parar la esguilada.

5 d’Ochobre de 2003

Franón, Juanjo, Oscár y Teca trespasen el duck, agora yá sifonáu, y faen dellos llabores al otru llau. Oscár y Juanjo entamen a facer un croquis de les galeríes aeries; Franón y Teca esguilen a cachos en llibre y a cachos n’artificial unos 20 m. pela chimenea del vientu, ensin atopar el techu. Acolumbren allarribones un furacu pel que parez que puede venir l’aire.

H.uenti’l Güeyu (Conceyu d’Oseya de Sayambre)

6 y 7 d’Avientu de 2003

La H.uenti’l Güeyu conózse como’l nacimientu del Ríu Seya, perbaxu’l Puertu’l Zalambral. Deyos canales recueyen les agües que cuerren peles fasteres y la que surde nel güeyu mesmu pa empobinala a la central hidroeléctrica de Pío de Sayambre. La fonte ye una grieta ente costeros de cuarcita non penetrable. Mal tiempu y lluvia abondo ficieron que fueramos a durmir a Buferrera, nuna teyavana, pa espertar a les tres de la mañana moyaos como pitinos. Aprovechamos el temporal pal domingu dir dica Fonte Obaya a ver si reventaba. Yera tal la bayura d’agua que salía, que la ponte del ríu Espasa taba somorguiada y el caudal que víamos venir de Fonte Obaya yera ablucante.

Garramos la moyadura Oscár, Juanjo y Teca.

Espedición Picos 2003, xunta la Federación Francesa d’Estudios y Deportes Somarinos (FFESSM)

Del 1 al 15 d’Agostu de 2003.

Andechamos cola  Federación Francesa d’Estudios y Deportes Somarinos na so espedición Picos 2003.  Mentantu la primavera fuimos organizando esta xera xunto a Frank Vasseur y Josep Guarro, pero Josep nun pudo venir al tener que dir a Nueva York a grabar un documental pa “Al Filo de lo Imposible” (TVE). La idega que tenemos ye revisar lo fecho polos suizos nos años 70, nes cuenques del Deva y el Cares, asina como esplorar la surdencia la Rede Toneyu n’Amieva (la Fonte la Redonda). Lo mas destacable de lo que se fizo ye la continuación de la esploración de la H.uenti’l Cuélebre (Conceyu del Valle Bah.u de Peñamellera) fasta 280 m. de llargor con una fondura máxima de -65 y finando la punta a -54. La esploración fízose usando trimix y osíxenu pa la deco. Tamién ye importante lo fecho na Fonte la Redonda (Conceyu d’Amieva) donde s’algamaron 1.500  metros de desendolcu horizontal nún perguapu ríu soterrañu tres d’un primer sifón poco fonderu de 100 m. de llargor. La punta d’esploración ta agora a 25 m. de fondura nel segundu sifón.

Na H.uenti L’Alisa (Conceyu de Cabrales), esploráronse cuatro nuevos sifones, algamando un desendolcu total esploráu de más de 1 km. Tamién se ficieron semeyes somorguiaes de delles cavidades amestando H.uenti Obar (Conceyu de Cabrales) al garapiellu de cavidaes visitaes.