«Arriluce»


Textu y semeyes: Xesús F. Manteca (GE Gorfolí –Asturies)

 

Mercante perteneciente a la naviera Catalana Marítima. N'agostu de 1936 tresportaba munición y armamentu dende valencia a Bilbao. Nes cercanies de Cabu Peñes (Gozón) foi atacaú el 21 d'agostu de 1936, de mano, pel Acorazáu rebelde "España", pero foi el tamién cruceru sobleváu "Almirante Cervera" el que-y dió caza cuando el mercante miraba de ganar la Ría d'Avilés. Tres de ser algamáu per dellos disparos de los cañones de "El Chulo del Cantábrico", el capitán camentó embarrancalu nel sablón de Xagó, pero los barcos rebeldes cortáron-y el pasu y acabó embarrancáu nos cantiles la Punta Llamperu, nes cercanies d'El Molín del Puertu (Gozón). Magar de tar dellos díes baxo'l fueu de los barcos facistes, tropes republicanes mandaes dende Xixón y Avilés consiguieron desgargar la so preciosa carga. El capitán, Policarpo Barañano Castaño, foi fusiláu en Ferrol pocos díes dempués. El "Arriluce" quedó enriba les peñes del cantil de Punta Llamperu partíu pel mediu, cola proa inundada y echáu sobre'l costáu d'estribor. Foi desguazáu ente los años 40 y 50 del sieglu XX. Güei entá queden dellos resclavos d'esti raque que pueden vese nes grandes baxamares añales.


   
enlace con la página espeleoastur.as