El Sistema Kársticu d'Orbaneja del Castillo (Burgos)


Por: Roberto F. García

Torna: Xosé Lluis del Río (GE Gorfolí - Asturies)

 

Entamu

Ente los pueblos burgaleses d’Orbanreja del Castillo y Bricia, desendólcase una rede soterraña de 8 Km esploraos fasta agora, con cinco cavidaes: cuatro d’elles (La Cueva del Agua, Cueva del Níspero, Cueva del Barbancho y Cueva de Socueto),  ábrense na Villa d’Orbaneja del Castillo, mentantu qu’a escosos ocho kilómetros al norte y dafecho nel Páramu de Bricia, allúgase la Cueva–Sumidoriu del Aguanal.

El ríu Ebro escavara les calices y calices dolomítiques del Coniaciense y Turoniense Mediu, formando una espectacular foz. La erosión del vientu y l’agua recortó los cumales  como si foren papel, papiroflexia singular de formes caprichoses asemeyaes a animales.

El ríu culuebrea al su pasu per Orbaneja, qu’engaramáu nel so cantil al abellu los vientos del norte, lu aguarda. Nesta peculiar llocalidá, declarada Villa polos Reis Católicos, ven la lluz dos importantes surdencies qu’afloren l’agua desumida nel Páramu de Bricia.

Una d’elles ye la Cueva del Agua que preside la plaza’l pueblu y cuyu caudal precipítase frenético ente remexones y poces de toba al alcuentru del ríu Ebro. Esta cavidá, de poco más de 600 m de desendolcu, ye obxetu de visites guiaes. Nel so interior encierra dos sifones de 80 y 120 metros, siendo’l menor propósitu d’esploración dientro’l proyeutu qu’anguaño se ta faciendo nesti sistema soterrañu.

A la fin de la Calle de la Cuesta y tres de superar la casa rural La Puebla, un senderín conduz a la Cueva del Barbancho. Tapecíu ente la vexetación, el llagu d’entrada tien una apariencia “xelada” por mor de les fines llámines de calcita en suspensión.

El Barbancho ta 9 metros penriba la Cueva del Agua y actúa como aliviaderu d’esta cabera cuando entra en carga. Anguaño, ye’l llugar principal au se centra l’actividá del equipu actual d’espeleomerguyadores y espeleólogos, habiéndose  esplorao fasta la fecha, 3.345 m de galeríes, y nún futuru cercanu, espérase xunir físicamente ambes dos cavidaes.

Lo que yá ye un fechu,  gracies a la topografía  que  van realizando xornada tres xornada, y a los medios emplegaos radiolocalización, ye la Cueva de Socueto. Una nueva entrada d’orixe artificial, que supón un accesu a les galeríes hasta agora esploraes accediendo namái que pela Cueva del Barnancho. Los buzos yá nun tendrán de superar los dos sifones d’entrada, 140 m y 25 m, separaos por un tarrecible llaminador. Pero los 200 primeros metros de percorríu de la  Cueva de Socueto carauterícense polos estrenchos llaminadores y gateres parcialmente somorguiaos, onde nun queda casi nin un palmu d’aire. El peligru de sifonase dafecho pola mor d’una esporádica tona, ye latente, pues penriba la cueva allúguense “Las Godas”, pequeños fontanales que drenen l’agua a esta cavidá.

L’accesu a esta nueva cueva ta restrinxíu pol Ayuntamientu, cola fin de salvaguardar l’acuíferu del que s’abastez la localidá d’Orbaneja.

Penriba’l cementeriu d’Orbaneja del Castillo ábrese la Cueva del Níspero. Esta cavidá fuera abondo visitada nes décades pasaes, colo que la güelga humana quedó  por desgracia reflexada nella.

El portalón d’entrada abelluga un xacimientu arqueolóxicu abandonáu. Los sos 3.600 m de desendolcu encierren perguapos corredores, llagos veyaos y grandes conductos con formaciones pa, al cabu, acabar sifonando.

La Cueva del Níspero está 21 m  penriba la Cueva del Barbancho y les sos galeríes entelácense nún planu superior con èsta, polo que nun descartamos una futura xunión ente ambes cueves.

A cuasi ocho kilómetros al norte, cruciando’l ermu páramu de Bricia, allúgase’l regueru del Aguanal, el cual desúmese na Cueva-Sumidoriu del Aguanal.

Esti sumideru, d’amplia boca d’entrada, tien pel momentu 450 m de grandes galeríes incluyendo cuatro sifones. Anguaño, ye tamién oxetu d’esploración, pues cuidamos que tien relación coles cueves del Agua y del Barbancho. Relación yá manifestada nel añu 1933, pol xeólogu Clemente Sáenz. La diferencia en cota d’esta cavidá a la resurdencia la Cueva del Agua ye de 257m.

Na zona d’estudiu tamién s’atopen fontes temporiegues que sólo activen n’époques de gran precipitación y cuevines que pel momentu nun tienen relación dala coles anteriores. Tampoco nun descartamos posibles conesiones que seique dirán incorporándose a esti Sistema Kársticu como resultáu de les esploraciones.

Breve cronoloxía de les esploraciones anteriores

Cueva del Agua (>> Pica equí pa ver les semeyes y la topografía d'esta cueva).

1964. El Centro Excursionista de Alcoy fai la primer esploración.

1978. El  C.E. Alcoy esplora 80 m / -9 m del primer sifón, que continúa.

1983. El STD esplora dafecho el 2u sifón ( 120m / -6 m).

Cueva del Barbancho (>> Pica equí pa ver les semeyes d'esta cueva).

1964. El  C. E. Alcoy, en xunetu, topografía 219 m na Galería los Alcoyanos.

1978. El C.E. Alcoy, esplora 80 m del 1º sifón (sifón d’entrada).

1996. Alfonso Antxía, en mayu, esplora dafecho el 1er sifón 130m/-4m.

1997. Alfonso Antxía supera un llaminador y un 2u sifón de 30m /-2m.

2000. Alfonso Antxía descubre galeríes aéries párase nún 3er sifón.

Cueva del Níspero (>> Pica equí pa ver les semeyes d'esta cueva).

1964. El  C.E. Alcoy  y  el C.E. Contestano entamen cola esploración y topografía.

1965. El  C.E. Alcoy y el C.E. Contestano terminen el planu topográficu (3.412 m).

1976. El  G.E. Gacela (posterior G.E. Equus) fai una nueva topografía.

1979. El  G.E. Telefónica de Madrid, entama una nueva topografía.

1989. Los grupos de Burgos G.E. Tazzelgurm y G.E. Edelweiss entamen una

         completa cartografía so la direición de Roberto F. García (3.600 m).

Cueva – Sumidero del Aguanal (>> Pica equí pa ver les semeyes d'esta cueva).

1965. El Servicio de Exploraciones Espeleológicas (Burgos) esplora la cavidá.

1978. El C.E. Alcoy esplora el 1er sifón y descubre una amplia galería aéria.

1992. El C.E. Alcoy vacía el 1er sifón y esplora un 2u sifón, parando nún 3er sifón.

1993. Roberto F. Gracia fai la topografía fasta’l 1er sifón col sofitu del G.E. delweiss,

         G.E. Rivas-Vaciamadrid y G.E. Tazzelgurm.

         El G.E. Rivas-Vaciamadrid accede a la amplia galería tres de superar el 1er

         sifón.

2002  Tres buzos de la C. Espeleobuceo de la F.M.E. esploren el 3er y 4u sifón.

Esploración actual, proyeutu y equipu.

Les esploraciones por parte l’equipu qu’anguaño trabaya nesti sistema kársticu comencipiaron na seronda de 2003, colos buzos del Ur-Sub: Amaia Olea y Daniel Santamaría; xunta los del G.E.Triton: Josi Olave, Javi Castro y Carlos Castro.

Na primavera de 2004, incorporáronse los espeleobuceadores del Ensame Aguarón (G.E. Gorfoli y S.E. Lenar): Xesús F. Manteca, Oscár Cuadrado, Isidro Baides, J. José Alonso, J. Lusarreta y más sero’l buzu Álvaro Subiñas.

Juan Galaz y Josep Guarro son los encargaos de procesar los datos topográficos mentantu’l debuxu en gabinete y el llabor de cordinación cuerre a cargo de Roberto F. García.

Les esploraciones anguaño

26-10-2003

Na Cueva del Barbancho, Amaia Olea, Daniel Santamaría y Josi Olave de los grupos Ur-Sub y G.E. Tritón, percuerren los 140 m del 1er sifón y tres de pasar un incómodu llaminador de 63 m, aporten a un 2u sifón. Faise la topografía de lo esplorao.

18-11-2003 

Na Cueva del Barbancho, Josi Olave y Dani esploran el 2u sifón ( 25 m/-1,5 m) y tres d’esguilar per una pequeña colada, esploren unos 750 m de galeríes, dalgunes inundaes pol agua. Topografíase fasta’l 2u sifón.

29 -11-2003

Na Cueva del Barbancho, los miembros del G.E. Tritón, Javi Castro, Carlos Castro y Josi Olave, atopen somorguiada la Galería los Alcoyanos ensin ser quiénes pa forzar el llaminador d’entrada.

8/9 - 4 -2004

Na Cueva del Barbancho, los buzos asturianos del G.E. Gorfolí (Ensame Aguarón) Xesús Manteca, Isidro Baides y  J. José Alonso, xunta los buzos del G.E. Edelweiss Álvaro Subiñas y Emiliano, divídense en dos equipos, unos topografíen 395 m a partir del 2u sifón y l’otru esplora 1.100 m.

21-4-2004

Na Cueva del Barbancho, l'espeleomerguyador Javier Lussarreta del S.E.Lenar (Ensame Aguarón) y Álvaro Subiñas esploren 357 m de la Galería Seca (Sector Superior) que nortia al SE, parando la esploración nún llagu de 100m ( “Lago Rompehielos”).

Mentantu, Xesús Manteca, Isidro Baides, y J. José Alonso progresen 300 m nel Seutor Acuáticu con un rumbu NW, dexando la esploración en dos puntos sifonantes, denomaos “Duck limpio” y “Duck Sucio”.

16 -5-2004

Na Cueva del Barbancho, Miguel Castro y Álvaro Subiñas faen semeyes y esploren dos laterales nel Seutor Acuáticu d’escosu desendolcu.

22-5-2004

Na Cueva del Barbancho, Xesús Manteca ya Isidro Baides, superen el sifón “Duck Limpio” y descubren una galería de 4 m x 8 m, de más d’un kilómetru de llargor, dexando la progresión por falta tiempu.

Esta espectacular galería bautizaríase col nome de “Royal Penetration”.

Tamién andecharon Álvaro Subiñas y Oscár Cuadrado p’aidar a portear el material de los sos collacios hasta’l “Duck Limpìo”.

4-9-2004

Na Cueva del Barbancho, Álvaro Subiñas y Javier Lusarreta topografíen 220 m na Galería Seca.

2- 10-2004

Na Cueva del Barbancho, Martín Burgui y Álvaro Subiñas topografíen 211 m más na Galería Seca, aportando a la fin d’ella, que s’atopa colmatao y con raíces.

Otru equipu formáu por Fernando Ausín y Roberto F. García (G.E. Edelweiss) topografíen 200 m de la Galería de los Alcoyanos fasta llegar a un sifón.

3- 10-2004

Na Cueva del Barbancho, Alvaro Subiñas y Fernando del G.E. Tritón, esploren tres sifones de 5 m, 10 m y 80 m, alternaos con tramos aérios fasta aportar a dos nuevos sifones.

Al tiempu, Josi Olave  y Miguel Castro van al final de la Galería Seca con un tresmisor d’ádenes (ARVA) y un radiu comunicador, mentantu fuera Roberto F. García, Mari Luz Hernado y Fortunato Lázaro, reciben la señal del ARVA y falen colos sos collacios al traviés de talkis, asitiando’l puntu de meyor receición.

Faise un nuevu asitiamientu del puntu onde a la fin entamará a picase p’abrir una nueva entrada, la cual yá tien nome, Cueva de Socueto. Josi Olave y Roberto F. García tán afuera y Paul y Alvaro Subiñas adientro. Otra vuelta col sofitu de los talkis y los ARVA, asítiase’l puntu esautu pa picar y entámase con esi llabor.

Na Cueva de Socueto, miembros del G.E. Gorfolí y del G.E. Edelweiss piquen un pozu en forma de “L” con una fondura másima de 3 m, aidándose d’un martiellu eléctricu. Colos datos que teníemos, sabíase que quedaba mui bien poco pa coneutar cola Galería Seca de la Cueva del Barbancho, pero decídese volver a entrar na cavidá pa dirixir certero la escavación.

22-4 -2006

Na Cueva de Socueto, miembros del Tritón, l’Edelweiss y Dya de Navarra siguen cola escavación. Álvaro Subiñas y tres buzos del G.E. Logroño entren pela Cueva del Barbancho. Como aguardábemos, la comunicación ente ambes dos partes faise a viva voz y a les 22:30 h., el Legía entra na cavidá colos sos collacios del autodenomáu equipu “Línea Verde”. D’estamiente, queda abierta la Cueva de Socueto.

La Cueva de Socueto (>> Pica equí pa ver les semeyes d'esta cueva).

Ensin dubia dala, ún de los resultaos que recompensen el trabayu fasta anguaño fechu por tol equipu, ye l’apertura la Cueva de Socueto.

Esta entrada artificial empezó a albidrase col descubrimientu’l Sector Superior que, ye curioso, tando empobináu por fractures bien visibles nel esterior, pasa d’una direición SE a nortiase al S, pa llueu morrer nún cantil.

La cartografía  la cavidá superpuesta nos planos no dexa llugar a duldes, la Galería Seca del Sector Superior queda peraverada a la superficie y los raigaños qu’ellí hai, asina lo auguraben.

Josi Olave y Roberto F. García punxéronse a ver la manera de cómo asitiar el puntu esautu nel esterior pa entamar a picar. Pa ello usóse un radiu comunicador modelu TalkAbout200 de Motorota, con una potencia de 500 mW, y un llocalizador electrónicu de víctimes d’ádenes (ARVA o LEVA).

A esti llabor, dedicáronse cuatro díes, dos pa asitiar el puntu esautu y dos pa picar; a la fin, el 22 d’abril de 2006, la entrada artificial de Socueto yera yá un fechu.

Como yá dixéramos, l’accesu per esta entrada ta restrinxíu, y hai peligru real de quedar dientro, al esistir un par de pasos sifonables.

N’esploración

Galería Alcoyanos – Cueva del Agua

Denominamos Galería de los Alcoyanos al ramal qu’abre a la manzorga la entrada la Cueva del Barbancho. Esti ramal sólo ye accesible pel branu, cuando’l nivel de l’agua dexa pasar a un tramu aériu de 216 m qu’acaba nún cortu sifón; tres de pasar ésti, conéutase con una serie sifoninos y curties burbuyes. La esploración nesti sitiu dexóse nún nuevu tramu con dos sifones. Tenemos l’enfotu de qu’esti conductu coneute a la fin cola Cueva del Agua al traviés del sifón esploráu polos alcoyanos en 1978.

Galería “Royal Penetration”

La “Royal Petration” ye un ampliu conductu d’unos ocho metros d’altor por cuatro d’anchor, au l’agua ocupa la mitá la seición. Llargos llagos separtaos por gours a  modu banzaos ye la carauterística principal. Fasta la fecha esploráronse unos 1.100 m con direición norte.

¿Podría ser ésta la gran avenida que mos empobine a la Cueva del Aguanal?. Esta ye la entruga que se fai l’equipu d’esploradores, pero entá ye ceo pa contestar: sepárenles 6 kilómetros.

Esta impresionante galería nel so aniciu cierra pol agua: un pasu sifonante denomáu “Duck Limpio” ye l’encargáu de nun dexar pasar ensin l’acondáu equipu de merguyu; pel branu’l nivel de l’agua amiya y el pasu abre.

Cueva-Sumidero del Aguanal

Esta cavidá ye la cabecera’l sistema kársticu d’Orbaneja del Castillo. La so boca abre al llau d’una cantera metanes el Páramo de Bricia. Fasta la fecha esploráronse  4 sifones y Roberto Cano, na prospeición que fizo en mayu de 2002, dexó l’avance nún corredor que baxa, viendo cómo l’agua precipitábase por un pequeñu remexón y ensin apreciar si volvía a sifonar o non. Lo que ta claro ye que l’agua’l regueru l’Aguanal sigue el so cursu y el llabor d’esti equipu d’esploradores ye saber aú va.


Semeyes Soacuátiques: Josi Olave (G. Espeleobuceo Tritón)
Más semeyes y topografía de la Cueva del Agua
Más semeyes de la Cueva del Barbancho
Más semeyes de la Cueva del Níspero
Más semeyes de la Cueva-Sumidoriu del Aguanal
Más semeyes de la Cueva de Socueto
Más semeyes n'Espeleoastur

Más información en: www.grupotriton.org

Más información en: www.espeleosub.blogspot.com

Orbaneja del Castillo. Semeya: Rupo

Cueva-Sumidoriu del Aguanal. Semeya: Rupo

Cueva-Sumidoriu del Aguanal. Semeya: Rupo

Merguyando na Cueva-Sumidoriu del Aguanal. Semeya: Rupo

Cueva del Barbancho. Semeya: Rupo

Cueva del Barbancho. Primer sifón. Semeya: Rupo

Entrando al primer sifón de la Cueva del Barbancho. Semeya: Rupo

Entrando al primer sifón de la Cueva del Barbancho. Semeya: Rupo

Llámines de calcita nel espeyu del primer sifón de la Cueva del Barbancho. Semeya: Josi Olave

Cueva del Barbancho. Primer sifón. Semeya: Josi Olave

Cueva del Barbancho. Primer sifón. Semeya: Josi Olave

Cueva del Agua. Semeya: STD

Entrada a la Cueva del Níspero. Semeya: Rupo

Cueva del Barbancho. Semeya: Josi Olave

Surdencia de la Cueva del Agua. Semeya: Rupo

Cueva del Níspero. Semeya: Rupo

Cueva del Níspero. Semeya: Rupo

Entrada a la Cueva del Níspero. Semeya: Rupo

Cueva del Níspero. Semeya: Rupo

Cueva de Socueto. Semeya: Rupo

Cueva de Socueto. Semeya: Rupo

Cueva de Socueto. Semeya: Rupo

 
   
   
   
enlace con la página espeleoastur.as