DELLES CAVIDAES DEL PARQUE NATURAL DEL MONTE REDES
CUEVA VALDEBEZON
CASU, ASTURIES

X.F. Manteca (Grupu d'Espeleoloxia Gorfolí)

 
 
 

La so entrada inferior ábrese xunta la mayada del mesmu nome, a pocos metros del camín que xube dende la Vega Brañagallones. La cueva actúa como sumidoriu activu del Regatu la Fonte la Corcoxa, que la percuerre dafecho. Xunta la entrada cimera hai una surdencia impenetrable.

La entrada cimera, de grandes dimensiones (2,5 m. d'anchor per 5 m. d'altor), da pasu a una galería meandriforme con dalguna pocina poco fonda. A los 50 m. de desendolcu, atopamos una salina a la qu'aporta pela manzorga un reguerín d'agua, per una galería con repla abondo. Una esguilada de 3 m. mos lleva a un meandru embarráu y estrenchu qu'acaba por cegase dafecho.

Tornando al ríu, la galería faise más grande y darréu atopamos un pozu de 4,6 m.f., pel que cai l'agua. La instalación ta montada a la drecha pa evitar l'aguia no posible.

A partir d'equí, la galería camúdase otra vuelta nún meandru, con más de 5 m. d'altor. Otru pozu, de 4 m.f., interrumpe l'avance, pesie que somos quiénes a destrepalu pente los costeros. El meandru estrénchase otra vuelta y el techu baxa de sutrucu, tresformando'l meandru nún tubu de presión. A los pocos metros el techu llevanta, enanchando daqué la galería. El techu baxa otra vuelta y agora'l tubu de presión ye más anchu qu'altu, siendo esti trozu galería, neto que'l otru tramu baxu, un sifón temporiegu en tiempos de crecida.

Adulces, el techu va llevantando fasta aportar al esterior, na entrada inferior, al traviés d'una galería de 5 m. d'altor. La fondura la cavidá ye de -21 m..f. y el so desendolcu ye de 382 m.

 

 

 

     
     
  enlace con la página espeleoastur.as