DELLES CAVIDAES DEL PARQUE NATURAL DEL MONTE REDES
Cueva la Canal fuerte - Cueva´l Fumu
CASU, ASTURIES

X.F. Manteca (Grupu d'Espeleoloxia Gorfolí)

 
  >> ver topografía
 
 
Cueva la Canal Fuerte
Allugada na cota 1.550 m.s.n.m., ábrese al esterior en forma de conductu a presión al pie d'un espolón rocosu que llenda pela manzorga la Canal Fuerte. Esti espolón recibe el nome de Pena'l Sellar.

La Galería d'Entrada (d'unos 200 m. de desendolcu) amuesa 7 pozos a lo llargo'l so percorríu. El primeru d'ellos ábrese a 80 m. de la entrada, a la drecha, nuna galería esfondada qu'aporta a la cabecera d'un pozu de 25 m.f., que fina nuna galería escomanada col suelu pindiu. Siguiendo galería arriba, éntrase nún meandru que tien una estrencha gatera. Sigue'l meandru con esguilaes, dalgún pasu estrenchu y abondo barru per 300 m. Llueu, otru meandru inclináu corta a esti, nortiando al sen contrariu al que veníemos siguiendo. Darréu, un pozu de 15 m.f. ponmos enriba un pocín de 6 m.f. y, depués, una rampla mos lleva a otru pozucu de 3 m.f., siguíu d'otru de 4 m.f. Tres d'un pozacu de 2 m.f., entama un reviráu meandru y llueu una galería de techu planu que da pasu a otru pozu de 5 m.f. Depués, faise preciso baxar un pozu de 20 m.f. de medianes dimensiones.

Nesti llugar, siguiendo'l correr del agua, aportamos a un pozu (P.60 m.f.), al que báxase per otra vía, pa lo cualo faise preciso esguilar 8 m., percorrer una corta galería y baxar un pozu de 11 m.f. que ta a la manzorga. Tres d'un pocín de 5 m.f., allugámonos na cebecera d'un pozu de 32 m.f. (El Pozón), d'escomanaes dimensiones, pel que cai l'agua. A la manzorga del pozu anterior, hai un pozu de 29 m.f. que nun sigue y a la drecha hai otru qu'aporta más abaxo a la vía principal. Travesando pelo fondero'l pozu de 32 m.f., topamos de frente con un pozu de 16 m.f. que mos lleva a la cabecera d'un pozón pergrande de 50 m.f.

No fondero esti pozu entama un meandru esfondáu que, tres de baxar 30 m., camúdase nuna galería meandriforme y, al poco, nuna gatera impenetrable pela que desúmese l'agua, algamándose los -203 m. de fondura.

Les galeríes de conesión cola Cueva'l Fumu, formen la otra rede galeríes de la cavidá. Estes galeríes entamen no fondero'l segundu pozu que s'abre na Galería d'Entrada de la Cueva la canal Fuerte. Esti pozu tien 31 m. de fondura y fórmase a favor de la fractura la Galería d'Entrada. Al pie d'esti pozu, la continuación ye una gatera qu'aporta a un pocín de 4 m.f. que cai a un derrabe costeros, onde pinta haber delles continuaciones so les piedres. La principal ye una serie destrepes per una grande galería, fasta aportar a un conductu horizontal con forma d'ampliu meandru. A la manzorga dexamos una gatera con suelu d'arena y seguimos la galería fasta una curva a la drecha, au dexamos tamién a la manzorga y a 2 m. percima'l suelu, un tubu a presión que ye la mecedura cola Cueva'l Fumu. Síentese un airín sele. Esti tubu fina piesllando a los pocos metros y sigue per una gatera en forma de Z qu'aporta a una pindia rampla (ye preciso usar cuerda), que cai no fondero'l pozu d'entrada la Cueva'l Fumu.

Tornando a la galería principal, seguimos delles decenes de metros fasta algamar una sala onde'l poco agua que cuerre peles pereés, desúmese ente les piedres del suelu. Equí fina la galería. La gatera de suelu d'arena que citamos más enriba, camuda a los pocos metros nuna cómoda galería. A la manzorga queda una galería que ye paralela a la principal y que se mece con esta no fondero'l destrepe de 4 m. Esta galería tien una variante que comunica col nivel cimeru la galería y que se superpón a la galería de la gatera d'arena. Unos metros más p'alantre de la gatera d'arena queda a la drecha un pozu ciegu de 10 m. de fondura. Depués, la galería xube daqué y atopamos lo fondero d'una chimenea qu'aporta agua a la galería. L'agua cuerre pela galería y mécese con un estrenchu meandru esfondáu que vierte agües a un pozu. Esti pozu ábrese nel suelu la sala en rampla de costeros inestables y comunica cola serie de pozos de la Cueva'l Fumu.

La instalación ye difícil, porque la roca ta roto y los anclaxes nun son de muncho fiar. Si xubimos la rampla de la sala, salimos a una chimenea con agua que comunica col pozu anterior, al traviés d'un estrenchu meandru. Toes estes galeríes tán formaes a favor de la fractura de la Galería d'Entrada y son los pisos inferiores d'esti conductu. Esto da abondos problemes a la hora representar la planta'l planu la cavidá.

Cueva'l Fumu (G-3)
La cavidá ábrese en forma de pozu ampliu, 50 m. más abaxo na mesma canal que la Cueva la Canal Fuerte. El pozu d'entrada tien 18 m.f. y tien un neveru no fondero. La continuación ye ente dos costeros, pa salir a una galería baxa y curtia con una gatera. Dempués vien otru pozu de 18 m.f., siguíu d'otru de 9 m.f. que, tres d'una rampla, aporta a un pozu de 7 m.f. Equí naz una galería amplia y pindia que tien una continuación a la so drecha. Esta lleva, tres 30 m. de desendolcu, a una salina. Siguiendo la vía principal, tenemos delles ramples qu'aporten a un pozu de 15 m.f. de moderaes dimensiones. Otra rampla y otru pozu de 15 m.f., déxenmos na cota -150 m.f., considerando cota +/- 0 m. la entrada la Cueva la Canal Fuerte.

Una amplia galería con un tramu esfondáu metanes d'ella, conduz al pozu más fondu, un pozu de 33 m.f. d'escomanaes dimensiones. Una corta galería aporta a un pozu de 6 m.f. y llueu a una salina na qu'hai delles posibilidaes:

- Gatera ascendente a lo primero y llueu horizontal, con dalgún pasu estrenchu, qu'aporta a un pozu que se torna impenetrable a los 5 m. de xubida.

- Pozu de 23 m.f. que conduz a una galería ribayosa pela que cuerre daqué d'agua pela so fin. Cierra nuna gatera impenetrable. Ye'l puntu más fonderu la cavidá, a -227 m. de fondura.

- Baxando 3 m. del caberu P.23, a la manzorga, una galería que s'empobina a una salina. Na sala, garrando una galería meandriforme a la manzorga, aportamos a un llaminador. La galería sigue fasta una gatera qu'aporta a un pozu ciegu de 15 m.f. Anantia'l final, hai una continuación a la drecha que mos empobina a una rampla y a otru pozu de 15 m.f. Per esti caberu pozu aportamos a un colector d'amplies dimensiones agües arriba fasta la fin nuna gatera cuasi somorguiada.

Agües abaxo, el colector tien dimensiones amenorgaes y ye un curtiu tramu que fina nún sifón a cota -227 m. de fondura. Dende equí, sólo queden 30 m. d'altor ente esti sifón y la surdencia, a 1.250 m.s.n.m.

El desendolcu total de la rede ye de 2.285 m.

 

 

 

 

 

     
     
  enlace con la página espeleoastur.as