Dos buques italianos no fondero les agües mallorquines


Torna: Xesús F. Manteca (GE Gorfolí –Asturies)

Fonte: "Diario de Mallorca"

 


Los cazatorpederos "Pegaso" ya "Impetuoso" buscaron abellugu n’agües de Mallorca mentantu la Segunda Guerra Mundial


Cuasi naide lo sabe, o nun lo remembra, pues yá pasaran 61 años dende que socedió, pero a unos cien metros de fondura, sobre sable, frente al cau Formentor, reposen los resclavos de dos cazatorpederos italianos. Ambosdos buques de guerra, pertenecientes a la Reggia Marina que llogró reunir Mussolini, taben integraos n’agrupación naval encabezada pol acorazáu Roma. La flotilla saliera de La Spezia el 9 de setiembre de 1943, hores dempués de conocese oficialmente l'anuncia l'Armisticiu ente Italia y les potencies alliaes.

Ente una drástica rempuesta alemana, que podía materializase nel atropamientu la flota italiana, entá perfuerte n'aquelles dates de la II Guerra Mundial, dende Supermarina -mandu de la flota italiana en Roma- ordenóse la so salida. Nel artículu 3 del Armisticiu afitábase la salida de tolos buques posibles de la Marina Militar dende les sos bases italianes con rumbu a La Valetta (Malta). De La Specia y de Taranto, les dos bases navales más importante de los italianos, fueron saliendo los gruesos de les escuadres asitiaes nel Mediterrániu occidental y el Mar Adriáticu.

Los buques de l'agrupación naval del Adriáticu empobinarónse a la isla de Malta, nun topando  novedá dala desfavorable mentantu la travesía. Pela contra, los navíos que dexaron La Spezia, al mandu l'Almirante Bergamini, qu’enarbolaba la so bandera nel acorazáu Roma, viéronse darréu atacaes polos alemanes. En llinia de batalla, l'agrupación naval punxo proa al oeste de Córcega, pa empobinase más sero pa contra Bonifacio. Al altor de La Magdalena, cerca'l mediudía, un avión xermanu de reconocimientu marítimu atopó l'agrupación naval del Almirante Bergamini. A les tres de la tarde, la formación naval italiana foi atacada por una escuadriella de bombarderos. Ente l'amenaza aéria xermana, los buques italianos entamaron a dixebrase. Magar de los trebeyos fechos, col envís d'evitar impactos enemigos, una bomba radiodirixida algamaba'l acorazáu Roma, col resultáu d'averíes graves nel timón. Cuasi de siguío, una segunda bomba pegaba dafechu nún de los pañoles de municiones del buque. Col españíu, la ponte de mando camudó nún barullu de fierros. En cuestión de minutos, l'acorazáu, francíu  en dos, diba a pique. De los 1.253 tripulantes del acorazáu Roma, 849 oficiales y marineros, incluyíu'l propiu Almirante Bergamini y la mayor parte'l so Estáu Mayor, quedaron atrapaos nel so interior, morriendo.

Fináu'l lletal ataque alemán, el cruceru Attilio Regolo, de 5.420 toneladas de desplazamientu, acompañáu de cuatro cazatorpederos, entamó la gueta y recoyida los supervivientes del Roma.

Al empar, dellos cazatorpederos de la escolta navegaron pa contra la faza onde fundieran los cazatorpederos Ugolino Vivaldi y Antonio de Noli. Ambesdos unidaes, de la clase Luca Tarigo, fueran algamaes por impautos de les bateríes de costa xermanes emplazaes en Bocas de San Bonifacio.

Ente los munchos náufragos del acorazáu Roma rescataos pol cruceru Attilio Regolo y los cinco cazatorpederos que lu escoltaben, a pique yá d'atapecer, optóse por que s'empobinaren al archipiélagu Balear, zona d'abellugu más averada. Mentantu l'Attilio Regolo y los cazatorpederos Carabiniere, Fuciliere y Mitragliere amuraben pa Maó, los comandantes de los torpederos Pegaso ya Impetuoso punxeron proa a Mallorca. Nesi intre, los acorazaos Italia -con daños producíos polos bombarderos alemanes-, y el Vittorio Veneto, xunta cinco cruceros llixeros y un cazatorpederu que formaren parte de la escuadra italiana cuyu gruesu saliera de La Spezia, navegaben ensin novedá pa Malta.

Na mañana'l 11 setiembre de 1943, ambosdos cazatorpederos italianos quedaben fondiaos frente al cau Formentor. Énte les negatives d'atraque por parte les autoridaes españoles, de previu alcuerdu, los comandantes d'ambosdos buques, presionaos pola llaceriosa situación -había dellos náufragos feríos a bordo-, acordaron fundir les sos respeutives unidaes. Los náufragos aportaron al Port de Pollença en botes, contando tamién cola axuda de dellos barcos de pesca llocales. Atendíos en tierra, oficiales y marineros foron confinaos n'estremaos llugares de la islla, dica la so repatriación, una y bones finada la guerra.

Anguañu, entá queden supervivientes d'aquellos fechos, tanto mallorquines como italianos. Ente ellos, alcuéntrense dellos militares isleños y dalgunes de les mallorquines qu'amadrinaron a aquellos marinos, cola so patria inda invadía y ensin noticies de les sos families. Pente la marinería de los dos cazatorpederos italianos autofundíos n'agües averaes a Formentor, atopábense dellos mozos sicilianos.

Respeutive la flotina italiana qu'entró nel puertu Maó, los sos buques quedaron internaos dica'l 15 de xineru de 1945. Finada la guerra, tuvieron dellos destinos. Mentantu duró l'internamientu los buques, parte les sos tripulaciones foi treslladada al balneariu de Caldes de Malavella (Girona).

Nel mesmu Cap Formentor, cerca los raques de los torpederos italianos Pegaso ya Impetuoso, atópase tamién el somarín español B-1, dalgunes de cuyes semeyes ilustren esti artículu. Esti barcu entamo a servir na guerra d'Africa en tiempu de Primo de Rivera y el Rei Alfonso XIII y fundiéronlu como buque blancu nos años 40.

El somarín español B-1, fundíu como buque blancu nos años 40 n'agües de Mallorca.

El somarín B-1, atracáu xunta otra unidá hermana nel Puertu'l Musel (Xixón, Asturies).

El B-1, saliando. Esti barcu entamó a servir na guerra d'Africa en tiempu de Primo de Rivera y el rei Alfonso XIII.

El B-3, hermanu del B-1.

Secuencia del fundimientu'l B-6, hermanu del B-1, cerca'l Cau Peñes (Asturies).

Los náufragos del B-6.


   
   
   
   
enlace con la página espeleoastur.as