EL GÜEYU DEVA

X.F. Manteca, torna: Xosé Lluis del Rio

 
 
 
 

El Güeyu Deva ye una fonte perconocía allugada nel Conceyu Xixón. Surden les sos agües so la Ermita la Nuesa Siñora de la Peña Francía, na Parroquia Deva, dientro les muries de la finca los Condes de Revillaxixéu. Son agües de propiedá privao polo que, pa esplorala, ye necesario solicitar permisu al dueñu la finca.

La Parroquia Deva ye ún de los llugares más guapos de la rodiada la villa xixonesa. Asítiase na fastera noroeste'l Monte Deva (426 m.s.n.m.) y entá guarda'l tastu del mou de vida de l'aldea asturiana, magar de tar a pocos minutos del centru urbanu de Xixón, siguiendo la Carretera Nacional N-632 en direición a Villaviciosa.

Les agües que surden na Fonte'l Güeyu, como tamién se la nombra, cuidamos que vienen de tres del Monte Deva, del estrenchu Valle'l Riosecu. Esti valle, naz na fastera norte'l Picu Fariu, na llende los conceyos de Xixón y Sieru, y desendólcase per más de 7 Km., hasta xuntase col Valle'l Regatu la Vega y mecese esti caberu al Ríu l'España, pocu anantia de desembocar na mar. A lo llargo d'esos 7 Km., el Riosecu tien abondos sumidorios pelos que l'agua desúmese. Magar de nun tener confirmación por coloración, camentamos que ye muncho bien posible que la surdencia d'estos sumidorios seya'l Güeyu Deva Otru aporte posible, podríen ser los fuexos qu'hai enriba'l Monte Deva. La fonte ye conocía dende siempres pola xente Deva y polos espeleólogos de Xixón; dalgún ficiera análisis de les sos agües. N'abril de 1997, l'Ensame Aguarón entama coles esploraciones, que dan como resultáu l'afayu la mayor cavidá'l Conceyu Xixón.

DESCRIPCIÓN DE LA CAVIDÁ
La poza la fonte tien unos 6 m. de diámetru y una fondura de menos de 40 cm. Cierra la poza un vieyu banzáu de piedra llabrao que recueye l'agua al traviés d'un tubu de fierro, empobinándola al llavaderu y a la fonte'l pueblu. Hai tamién restos d'una presa más vieya que llevaba l'agua a un molín, anguañu desaniciáu. Pola pinta, nun paez tener entrada posible. Ye como si l'agua surdiere pente les fractures d'estratificación horizontales de la peña, a lo ancho tola poza. Por eso'l nome d'esta roca, la "Peña Francía"... esto ye, "frañada".

A la derecha la poza hai un furacu d'un metru escosu d'altor, que permite'l pasu somorguiáu al primer sifón. Darréu, el suelu estráu de regodones y sable fino, baxa en rampla y la galería medra de sutrucu. Equí tien unes dimensiones de más de 6 m. d'anchor por 3 m. d'altor. La fondura ye de 4,5 m. y el suelu ta tapecíu por grandes costeros esgayaos del techu. A los 15 m. de llinia hai una campanina na que nun ye dable sacar la tiesta l'agua. La continuación ye somorguiada y amplia penriba los costeros. Nel techu hai delles formes de corrosión y darréu salimos a otra campana más grande. Ésta nun tien orielles y hai que quedase flotando na superficie. El techu la campana ta a unos 2 m. penriba la superficie l'agua y vénse dalgunes formaciones piquiñines. Tamién s'aprecia que pinga en forma nos díes de lluvia.

Dende esta campana podemos seguir per dos llinies pa pasar al segundu sifón.

Al entamar coles esploraciones, la llinia de vida baxaba a 4,5 m. y pasaba per un pasu estrechu perbaxu un costeru. Nesti llugar, l'agua véyase muncho y ye un sitiu peligrosu a la hora de tornar a l'esterior. La otra posibilidá ye una amplia galería que cuando hai seca conviértese nún duck, pero que nes primeres esploraciones nun s'atopó pola mor de lo veyao que taba l'agua.

Salimos tres de 20 m. de llinia a otra campana más grande que l'anterior, ensin orielles, pero na que vése nidio la fractura que foi l'orixe la cueva. Equí yá nun hai tantos costeros no fondero la galería. Entamen apaecer dalgunes formaciones: estalactites, macarrones y banderes. Esta campana tien más de 10 m. de llargor y el techu ta a casi 5 m. penriba l'agua. A lo cabero la campana, apréciase otra vuelta la fractura a partir de la cuala formóse la cavidá.

Volvemos a somorguianos, esta vez en vertical, p'algamar un gran conductu de seición cuasi cuadrao, col suelu d'arena y regodones. Hai tamién dalgún costeru. Tres d'unos 25 m. de llinia a 5,8 m. de fondura, termina'l tercer sifón: el techu xube y la galería dexa de ser somorguiada. Entama equí una gran galería inundada, formada a favor de la fractura, la Galería Grande, con más de 5 m. d'altor y sobre 100 m. de llargor. L'anchu alcanza nel nivel de l'agua los 4 m. Ye recta dafecho y ta nortiada a 150º. Pinguen del techu abondes formaciones y apréciase perbién la fractura. A los 60 m. de desendolcu, entama un ramal inundáu entá ensin esplorar.

Hai que nalar los 100 m. p'algamar una sablera d'arena fino au la galería fai una curva y torna somorguiase nel cuartu sifón. Esti tin poca fondura, unos 2,5 m., pero 30 m. de llargor.

La galería ye escomanada, más de 6 m. d'anchor y de seición cuadrao. Los costeros tan tapecíos no fondero embaxu abondo sable. El sifón fina nuna rampla enantes de salir a otra galería inundada, tamién de grandes dimensiones, anque equí hai dellos sitios onde se fai pie. Tien esta galería un llargor de 50 m. y una seición de 6 m. de diámetru. Depués, el techu desapaez so l'agua otra vuelta, faciendo'l quintu sifón. A los 10 m. de llinia a 4 m. de fondura, aportamos a una campanina ensin orielles. El sifón sigue con dimensiones escomanaes otros 20 m. más, fasta dar a una sala reonda inundada. Equí, el techu tien más de 8 m. d'altor y el diámetru de la sala ye d'unos 15 m. A la derecha entama una galería ensucha, col suelu tapecíu por llábanes cuadraes y costeros cayíos del techu. Una gran columna, dá-y un calter especial a esta galería, polo que la denomamos la Galería la Columna. Tien una seición de 6 x 4 m. y les parées con abondes concreiciones.

Tres de caminar este los esbarriosos costeros unos 60 m., atopamos la fin de la galería nún pequeñu sableru mecío con daqué de grava gordo que llenda un charcu. Esti charcu, de 2 x 1 m. de superficie y de menos de 50 cm. de fondura, ye'l sestu sifón. Tres 5 m. de llinia per esti estrenchu sifón cuasi enllenu d'arena y col agua veyao, salimos a otra poza grande de techu altu y 5 m. de diámetru.

Entama otra galería seca col techu cubiertu de formaciones perguapes y con un anchor de 3,5 m. que sigue asina per 30 m. fasta acabar na poza'l séptimu sifón. Esti ye un sifón cortu, pero a la contra del anterior, otra vuelta de gran diámetru. Nun tien más de 10 m. de llargor y sal a un llagu nel qu'hai de nalar 30 m. p'aportar a la oriella. Equí siéntese l'agua, que más allá cuerre penriba d'un mantu estalagmíticu. Abonden les formaciones, destacando un grupu d'elles de forma antropomórfico que podría remembrar un altar con figures. Por eso lu denomamos L'Altar de Deva. La gelería sigue ensin agua, grande, con munches estalactites y costeros cubiertos de calcita y abondos macarrones enriba d'ellos. El paisax interrúmpese polos costeros y los montones de sable que rellenen la galería, que va estrechando adulces fasta algamar, tres casi 170 m. de desendolcu, un nuevu sifón abiertu a favor d'una estrencha fractura. Equí ta la punta pa les prósimes esploraciones. Cuidamos que'l desendolcu tien d'algamar cerca los 650 m., anque habrá de confirmar estos datos cola topografía.

ESBOZU XEOLÓXICU
La entrada la cueva, y seique tola cavidá, allúgase nún contautu estratigráficu ente dos formaciones del Xurásicu, el Sinemuriense Mediu y el Sinemuriense Superior. Amás, esi contautui vése alteriáu por una falla nortiada na llinia Este-Oeste. El Sinemuriense Supoerior ta compuestu por calices grises y negres, polo xeneral fétides, con abondes vetes de calcita y estratificaes en bancos gruesos. En xeneral son perprobes en fauna fósil. La potencia media d'esta formación na rodiada de Xixón ye de 70 m. A les calices del Sinemuriense, sígue-yos un serie muncho bien regular de calices arcilloses estratificaes en capes regulares y uniformes, con espesores medios de 20 a 40 m. en bancos gruesos. Estos estratos dixébrense unos d'otros por delgaes capes de margues. En cuantes a la teutónica d'esta fastera hai que destacar la presencia d'un pliegue antiforme nortiáu Noroeste-Sureste con pequeños buzamientos ente 10 y 12 graos, que da llugar a les llombes de Pedroco, Fondón, San Antoniu, Reguera, etc. Esti pliegue forma parte l'anticlinoriu hercinianu d'esta fastera la costa asturiana.

BIBLIOGRAFÍA
- Ensame Aguaron. "El Güeyu Deva". En Actas del 7º Congreso Español de Espeleología. Federación Española de Espeleología. Barcelona, 1997. Pp. 125,131.

- Ensame Aguarón-G.E. Gorfolí. "El Güeyu Deva". En Magma, Boletín de Información Espeleológica. Asociación Cultural Magma. Númberu 5. Xixón, avientu 1998.

- Fernánde, Xosé Ramón. Deva, la Güella de la Diosa Astur. Editorial Trabe. Uviéu, 1998.

- G.E. Gorfolí, "Campaña 1997". Informe, non asoleyáu.

- G.E. Gorfolí, "Campaña 1998". Informe, non asoleyáu.

- Jiménez, M. y Anadón, S. "El Valle de Rioseco". En Magma, Boletín de Información Espeleológica. Númberu 5. Asociación Cultural Magma. Xixón, avientu 1998.

- Manteca, Xesús Fernando; Río, Xosé Lluis del; y Alonso, Xuan Xosé. "El Güeyu Deva. Aportando al otru llau del espeyu". En Asturies, Memoria Encesa d'un País. Númberu 6. Conceyu d'Estudios Etnográficos Belenos. Uviéu, marzu 1999. Pp. 85 a 95.

- Morán, Xurde. El Camín Xixón Cuadonga. Alborá Llibros. Xixón, 1998.

AGRADECIMIENTOS
Estos trabayos d'esploración nun habríen ser posibles ensin el sofitu y la colaboración de delles persones ya instituciones, ente les que queremos destacar a la Federación Asturiana d'Espeleoloxia; Federación Española de Espeleologia, Conseyería de Cultura y Deportes del Principáu d'Asturies; Deportes Pardo (Avilés); D. Álvaro Armada, Conde de Revillaxixéu; D. Carlos Ulecia, analista químicu, bon conocedor del medio soterrañu; y D. Xurde Morán, de la "Tertulia Cultural El Garrapiellu", de Xixón.

 

entrando en Deva

saliendo de Deva

 
>> les semeyes

 

 

más información:

>> Hestoria de les esploraciones
>> Cuentos del Güeyu Deva
>> El Güeyu Deva. Aportando al otru llau del espeyu
>> presentación con semeyes a pantalla completa -branu 2003- pue tardar un poquiñín en cargar caúna
>> vídiu con entrada y salida na surdencia

 
     
  www.espeleoastur.as