La Cueva Sequeiras
Cangas del Narcea - Asturies

J.F. Manteca (Grupu d'Espeleoloxia Gorfolí) 

  >>ver topografía

 
 

ALLUGAMIENTU
La localidá más averada a la cueva ye Monasteriu d'Ermu, pueblu que pertenez al Conceyu de Cangas del Narcea. Dos kilómetros enantes de llegar a esti llugar déxase la estrada y hai que garrar una caleya que crucia'l Ríu Narcea y que seguimos fasta un biforcu. Equí garraremos la caleya que xube penriba d'unes bocamines y que tá en peor estáu. A la fín de la caleya, al pie d'una cabaña, entama un camín qu'adiéntrase nel Monte Cerezaléu y fina nuna vallina con restos de cabañes ente les fayes. Dende les ruines seguiremos un senderu que xube pela lladera fasta la boca cimera la cueva.

Sigún la fueya númberu 100, Degaña, del Instituto Geográfico y Catastral les cordenaes UTM de la cavidá son:

X= 697.370, Y= 4.761. 490, Z= 1.300 m.s.n.m.

NICIOS ESPELEOMETRICOS
Tres de la topografía conocemos los nicios siguientes:

Desendolcu: 796 m.
Fondura: -59 m.f.
Desnivel: 74 m. (-59, +15)

 

HESTORIA
La importancia d'esta cavidá nun tá nes sos dimensiones sinón en ser la primer cueva esplorada n'Asturies de la que se tienen nicios. En 1785 asoléyense los Discursos Pronunciados en la Real Sociedad de Oviedo por el Conde de Toreno, u, ente otres coses, descríbese casi la totalidá la Cueva Sequeiras. Más p'alantre, en 1916, Mario Roso de Luna, escritor ocultista, espubliza nel so llibru "El Tesoro de los Lagos de Somiedo" la descripción del Conde de Toreno amás de la so propia descripción de la cueva un tantu pantástica.

Nós atopamos resclavos d'esploraciones anteriores en forma d'inscripciones con carburu y resclavos d'antorches. La más averada a la entrada ye de fecha reciente, 26 de Setiembre de 1992, al llau de la cual ta escrita la pallabra Rengos, pueblu averáu a la cavidá. La inscripción más interesante atopámosla a la fin de la Galería les Pirámides; tá fechada el 19 d'Agostu de 1920 y ye una llista de dellos nomes: Pepín, M. Teresa Ferreiro, Marino Pérez, Nieves Staller, Manuel Velasco, Piedrafita. Cola mesma fecha, 19 d'Agostu, hai otra llista nomes na entrada: Covón, Marcial, Fernando, Alfredo. Sedría interesante conocer quiénes yeren estes xentes qu'entraron tan dientro la cavidá y si tienen, pela fecha, rellación col asoleyamientu del llibru de Roso de Luna.

El 10 d'Ochobre de 1992, miembros del Grupu d'Espeleoloxia Gorfolí gueten la entrada la cueva per tol dia, alcontrándola a la cabera hora la tarde. Por fín, el 15 de Payares de 1992, esplórase casi la totalidá la cavidá y topografíase parte de lo esplorao, 553 mts.

El 14 de Marzu de 1993 esplórase del tóo y complétase la topografia algamando un total de 796 m. de desendolcu.


DESCRIPCION DE LA CAVIDÁ

>>ver topografía
La pequeña entrada (2 m. por 1 m.) da acesu a una sala de medianes dimensiones col suelu irregular tapecíu del tóo de piedres anguloses y sueltes. La continuación ye una fácil esguilada de 3,6 m. onde atopamos dalgunes formaciones de considerable tamañu. Entama na fastera cimera de la esguilada un meandru con abondes concreiciones que va enanchando les sos dimensiones pasu ente pasu fasta vese torgáu per un anchu pozu de 3 m. de fondura, El Pozu.

Arrodiando El Pozu pela mandrecha algámase la galería qu'escomencipia a amiyar pasu ente pasu y nórtiase al Nordés fasta un pequeñu enanchamientu de la galería. Equí el suelu vuelve tar tapecíu per costeros cada vuelta más grandes y mal sofitaos, y la galería continúa meandriforme pero evolucionada a conductu a presión. La parte cimera algama los 5 m. d'anchor mientres que la fondera nun llega al mediu metru na so fastera más ancha. L'estrenchu meandru fonderu tá en dalgunos llugares tomáu por costeros. La galería xube selemente fasta quedar torgada per una fondigonada. Baxando una esguilada de 3 m. alcontramos nel fondu dos pequeñes galeríes con abondes formaciones que zarren a los pocos metros. El suelu ta tapecíu por un mantu estalagmíticu y por costeros mal sofitaos. Pa continuar fai falta esguilar per un resalte de 3,5 m. siguíu d'otru de 5,7 m. (sollertes nesti puntu a los costeros de la cabecera) qu'algama la cota cimera de la cueva: +15,25 m. A partir d'equí continuamos pela fastera cimera la galeria por tar la fondera enllena materiales, y dempués de 10 m. de desendolcu llegamos a la cabecera d'un pozu de 6,3 m. Faciendo un pasu n'oposición un tantu arriesgáu aportamos a una pequeña galería con abondos costeros que va estrechándose pasu ente pasu pa finar nún anchu pozu de 15 m.

Embaxu'l pozu de 6,3 m. nomáu anteriormente atopamos una gran rampla costeros de 7,5 m. de fondura y una seición de 10 m. d'anchor per 5 m. d'altura que desemboca nuna galería horizontal col suelu repla de midíes más reducies. Tres 20 m. de desendolcu ábrese la Sala'l Conde, siendo esta cámara de planta triangular la sala más grande la cueva. Cerca'l so techu ábrese una ventana que nun ye otra que la galería que parte de la cabecera'l pozu de 6,3 m. y acaba na vertical de 15 m.

Nesta sala hai dellos costeros que, con imaxinación, podríen remembrar les pirámides descrites pel Conde de Toreno. Les midíes de la planta son 15 x 10 m., teniendo a cierta altura una curiosa forma d'erosión turbillonar nes sos parees que remembra una "Media Naranxa".

Dempués de 25 m. de percorríu per un ampliu conductu con repla abondo nel suelu algámase la fin d'esta galería nuna zona colmatada por repla y piedres d'estremáu tamañu. Esti puntu tá a -4,5 m. de fondura y nomamos esta galería la Galeria de les Pirámides. Ta abierta esta galería, dende la entrada enriba d'una nidia rede de resquiebres.

Amiyando El Pozu, el primeru de 3 m. nomáu, alcontramos una galeria de seición triangular medio tomada per costeros, torgada por un pozu de 4,2 m. Nel fondu la galería enánchase y el suelu apruz ocupáu per dalgunos gours; darréu ábrese una sala con una fondigonada con costeros y bayura de formaciones. Nortiada al Sur ábrese una galería que a los pocos metros sal al esterior 5 m. perbaxu la entrada cimera.

Nel fondu la fondigonada la sala entama un pasaxe de techu baxu col suelu de piedres sueltes, que dempués de 10 m. de desendolcu da accesu a un estrenchu pozu ente costeros de 2,5 m.f. Si se xube ente los costeros llégase al fondu de El Pozu. Baxando el pozu de 2,5 m.f. aportamos a una galería de grandes dimensiones perpindia y con costeros grandes en suelu. Apréciase nidio que tá abierta so la mesma resquiebra que la Galería les Pirámides, de magar qu'en dalgunos puntos enancha considerablemente al amestase con dalgunes de les regalles perpendiculares a la principal. N'ún d'estos puntos ábrese una pequeña galería cimera nortiada al Noroeste, a la que ye posible llegar tres d'una esguilada de 5 m.

La galería principal continúa dempués de la rampla ensin ganar desnivel dexando a la mandrecha dos galeríes colgaes. La primera ye una sala pequeña qu'algámase dempués d'esguilar 12 m.; la segunda entama en forma de rampla perpindia que llega a ponese dafecho vertical durante los 7 m. caberos y fai falta esguilar. Enriba entama una galería horizontal de 20 m. de llargor zarrada por colmatación.

Avanzando unos metros más pela galería principal, ésta vése torgada per una esguilada de 2,5 m.f. qu'ábrese enriba d'una amplia sala, La Sala de la Lluz de Nafta, con bayura costeros mal sofitaos. A la manzorga la sala entama una vertical de 10 m.f.; trátase d'un pozu d'amplies proporciones que cai enriba un fondu de mantu estalagmíticu que sólo dexa una pequeña continuación. Esta ye una esguilada de 3 m.p., El Pozu los Gargaxos, que continúa con una rampla enllena concreiciones, siendo'l llugar de la cueva con más espeleotemes. La rampla fina nún cortu tramu horizontal zarráu por formaciones y repla, y ye'l puntu más fonderu la cueva: -59 m.f.

BIBLIOGRAFIA
- Roso de Luna. M. "El Tesoro de los Lagos de Somiedo", Colección Reconquista, Libros de Asturias Recuperados. Editor Silverio Cañada, 1980.
- Discursos Pronunciados en la Real Sociedad de Oviedo por el Conde de Toreno.

PARTICIPANTES NOS TRABAYOS
J.L. Agüero Juan G.E. Gorfolí.
F.J. del Busto González (Pachu) G.E. Gorfolí.
J.M. Fernández Arraiz (Pepo) G.E. Gorfolí.
J.F. Manteca Fraile (Teca) G.E. Gorfolí.
A.A. Medina Martínez G.E. Gorfolí.
M.T. Ojeda Alonso (Maite) G.E. Gorfolí.
M. Pérez Gimeno (Marifé) G.E. Gorfolí.
J.M. Seoane Alonso (Fane) G.E. Gorfolí.

Grupu d'Espeleoloxía Gorfolí
Avilés, Xineru 1995

 

 

     
     
  enlace con la página espeleoastur.as