REDE’L SOH.ORNU
Llanes, Asturies
 
 
 
 

La Rede’l Soh.ornu asitiase nel escar mariñan d’Andrín, Conceyu de Llanes. Nesti pequeñu paisaxe caliar atopamos casi tolos acidentes posibles que se dan nos tarrenos cársticos. Fuexos, escares, cueves, pozos, sumidorios y surdencies amontonense nuna superficie que nun pasa del kilómetru cuadrau. Nel interior d’esti escar desendolquense casi 10 kilómetros de galeries ensin empatar, magar que delles cavidaes pasen ya de 1.000 m. de desendolcu como ye’l casu de la Cueva’l Soh.ornu y la Cueva la Sonrasa. Esta rede ta siendo esplorada pela S.E. Hades.

El sabadu 10 d’Ochobre de 1998 faise un percorriu esterior del escar pa facenos una idega de la fastera. Llueve a barcalaes y garramos una pingadura curiosa. Ye importante el sumidoriu de Riellu y la surdencia de la Fonte’l Molín, peraverada al Ríu Purón. Esta surdencia sirvió nel sieglu XVIII pa facer una pexefatoria, de la qu’entá tan de pie dalgunos banzaos.

Pela tardi vamos a la Cueva’l Soh.ornu (2.200 m de desendolcu) pero como ta inundada nun podemos llegar al sifón. Visitamos tamién el sifón de Pellunarices (más de 1.000 m de desendolcu) pero l’agua ta 3 m. más alto de lo normal. Si consiguieramos empatar estes dos cueves algamariase una gran cavidá de más 3 km. de llargo.

Llueve tola nueche, asina que’l domingu dia 11 nun intentamos siquiera averanos a la cueva. La Fonte’l Molín echa’l agua travolgando asina que dedicamos el dia a ver les playes carstiques de Buelna.

Andechamos Juanjo, Rebeca, Raul, Isidro, Marife, Delri y Teca del G.E. Gorfolí y Juan Andrés, Teresa, Pablo y Willy del S.E. Hades.

El 28 de Payares de 1998 Juanjo y Teca somorguiense nel sifón de la Cueva ‘l Soh.ornu. Teca pasa un llaminador somorguiáu y algama una galería de dimensiones más cómodes. Dempués de 10 menutos d’inmersión torna a l’esterior dexando’l carrete a 15 ó 20 m de la entrada. L’agua ye clara pero al tornar véyase al fozar nel llaminador. El poco altor del llaminador obliga a apartar les botelles del pechu, nun evitando asina l’empotramientu del llombu escontra’ l techu.

Cuando l’agua esclaria, métese Juanjo y avanza otros 20m más. Al volver atórase delles vegaes nel llaminador poniendo a preba la so calma y serenidá ensin perdela, pero abandona’l carrete. Por suerte, tóo queda nun mal tragu. Camentamos volver otru día y mirar de somorguianos nel sumidoriu pa empatar les dos cueves y recuperar el carrete tresmanáu.

Sofitaron a los merguyadores: Raúl y Trubia del G.E. Gorfolí y Juan Andrés, Teresa, Pablo y Willy de la S.E. Hades.


 
 

 

 
     
  enlace con la página espeleoastur.as