L.laseiru, 1985


Mario Larrea Poladura (Seición d’Espeleoloxia de l’Asociación Montañera Astur Torrecerredo)

Xesús F. Manteca (GE Gorfolí-Asturies)

Avientu, 1985

 

Entamu

A Ubiña, magar de ser una importante rexón kárstica, nunca nun se-y diera la debida atención por parte los grupos d’espeleoloxía. Anguañu, el primer oxetivu los espeleólogos, tanto nacionales como internacionales, son los Picos d’Europa.

Dica’l branu pasáu conocíense n’Ubiña sólo tres cavidaes d’importancia: el Pozu la Val.lina’l Corru (-220 m.f.), la Cueva Mel.luqui (alredor de 1 km. de galeríes) y el Pozu la Carba (-356 m.f.), la cavidá asturiana de mayor fondura fuera los Picos d’Europa. Pa mirar de rellenar esti furacu, el Grupu d’Espeleoloxia Gorfolí, que dende 1983 carecía de zona de trabayu determinada, solicitó en xunu de 1985 l’asignación d’una fastera nesti macizu por parte de F.As.E. dempués d’un curtiu reconocimientu’l llugar.

Esta faza ta llendada al norte pela Riega la Foix, al este pel Riu’l L.laseiru, al sur pela llende con Lleón, y al oeste pela caleya de Ricao al Puertu Ventana y la, ya nomada anteriormente, Riega la Foix.

El resultáu de la esploración nesta faza foi l’atopar la Rede R-1/R-2, que, colos sos 420 m. de fondura, pasó a ser la cavidá de mayor desendolcu vertical d’Asturies fuera de los Picos d’Europa y la mayor fondura algamada por un equipu asturianu nun pozu desconocíu.

La esploración d’esta cavidá sedría imposible en sin l’andecha inestimable de la Seición d’Espeleoloxia de la Asociación Montañera Astur Torrecerredo y el sofitu del Club Deportivu Universitariu San Gregorio.

Esperamos continuar la esploración y l’estudiu de la Rede R-1/R-2 mentantu’l branu de 1986.

>> ver topografía


Marcu Xeográficu

Sobre esta fastera hai escrites delles monografíes montañeres. La Rede R-1/R-2 ábrese na paré norte’l Ranchón, al pie del pindiu Canalón de Rolamuela. Esti arispiu picu, alcuéntrase nel nerviu norte d’Ubiña y los sos 2.162 m.s.n.m. (700 m. de paré penriba’l L.laseiru) faen d’elli un pegoyu ablucante. Pel Oeste ta llendada la so vertiente pola Veiga’l Robezu, importante fuexu cuyes agües son drenaes pola Rede R-1/R-2. Ye per esti llugar per onde percorre’l camín de subida al Ranchón. La Veiga’l Robezu separta tamién a esti picu pel sur de El Pachón y de la Pena La Cigal.l.a, asina como pel norte aísllalu de los Picos del Güertu’l Diablu el Canalón de Rolamuela.

 


Allugamientu

El llugar más averáu a la cavidá ye Ricao, aldega del Conceyu de Quirós. Les sos cordenaes aprosimaes sigún el planu 1/50.000 de la F.E.M. del Macizo de Ubiña son:

X= 5º 17’ 48”; Y= 43º 31’ 45” Z= 1.505 m.s.n.m.

 
 
 
Cómo dir

 
A) Uviéu-Ricao.- A la capital del conceyu Quirós, Bárzana, llégase dende Uviéu pela carretera local Trubia-Ptu. Ventana dempués de pasar el biforcu de Caranga. Siguiendo pela carretera llegamos a Santa Marina, llugar onde s’amesten los valles de L.lindes y Ricao y onde tenemos de garrar la ruta de la drecha que, tres de 6 km. de carretera estrencha y arrodiada de trupes biesques, llévanos a Ricao (49 km. dende Uviéu).

B) Ricao-Rede R-1/R-2.- En Ricao gárrase la caleya que s’empobina al Puertu Ventana dica la mecedura de la Riega la Foix col Riu’l L.laseiru, ú dexamos la caleya pa garrar el camín del Monte Parada, qu’algama lo más píndio en Las Infiestas. Tres d’estes camperes alcuéntrase l’amplia Veiga’l L.laseiru. Siguiendo pela sienda, que nesti llugar desparez ente’l pastu, dexamos a la mandrecha les cabañes de L.laseiru y a la manzorga La Trelda pa remontar les ramples que suben al Cuetu Pachón. Dempués de subir unos 100 m. de desnivel algamamos el Trave Rolamuela, que tien na parede que lu llenda pela manzorga les entraes de la rede. (Tiempu: 3 hores 45 minutos; 900 m. de desnivel dende Ricao).

 
 
 
Hestoria de les esploraciones

 

Mentantu la Selmana Santa de 1985 tres montañeros del Grupu de Montaña Gorfolí descubren la boca fondera de la rede gracies a que la cueva esnelda y puede allugase a muncha distancia. Esploren, coles sos llámpares frontales y el so material d’esguilada, una serie de pequeños pozos dica llegar a una grande galería onde la continuación ye un pozu qu’atalanten, dempués de dellos sondeos, en 30 m. de fondura. Al otru día esploren una galería ascendente de grandes dimensiones al traviés de la que salen al esterior más penriba nel Canalón de Rolamuela. Toos estos nicios son comunicaos al Grupu d’Espeleoloxia Gorfolí, qu’esperen al branu pa seguir coles esploraciones.

29 y 30 de Xunu de 1985.- Pepe Toño y Teca, del G.E. Gorfolí, y Javier y Begoña del C.D.U.E. San Gregorio entren pel Ptu. Ventana y faen un reconocimientu la faza ensin alcontrar la cueva pero atopando dellos pozos presumiblemente rellacionaos cola rede.

20 y 21 de Xunetu de 1985.- Tres d’un par de xeres col Coleutivu Asturianu d’Espeleólogos (C.A.D.E.) tórnase a la faza cola intención d’atopar la cueva. Nuna d’estes xeres nomaes convidóse a la Seición d’Espeleoloxía de la Agrupación Montañera Astur Torrecerredo. Asina, Tito y Teca, del G. E. Gorfolí, y Toño, de la S.E.A.M.A. Torrecerredo, empobínense al traviés del valle de Ricao a la Veiga’l L.laseiru . La trupa borrina fizo necesario l’usu de compás y mapes pa nun perder l’inciertu y desconcertante camín y, más sero, pa guetar, ensin dar con ella, la cueva.

La mañana siguiente alborez escamplada, lo que facilita l’atopar la cueva, yá que ye posible vela dende les cabañes de L.laseiru. Instálase’l pozu d’entrada y baxen Toño y Teca, mentantu Tito esplora unes pequeñes cueves averaes ensin que ninguna empate col pozu.

El fondu’l pozu ye un trave perpindiu, a la fin del cualu hai un pozu de 10 m. que cai nuna pequeña sala col suelu tapecíu de sable y pequeñes piedres que cierra dafecho. Al subir esguílase una parede de 3 m. onde aparecen un par pozos y una curtia gatera. Mentantu Toño esplora la gatera, Teca baxa’l pozu qu’atalanten más fondu. Tres de la gatera algámase una sala ú s’abre un pozu que sondia en 30 m. Nel pozu grande, Teca llega dica una estrencha repisa onde se-y acaba la cuerda. Dende equí, camienta que-y queden unos 20 m. de pozu pa tocar fondo. Salen desinstalando y dexen una cuerda pa subir la esguilada de 3 m. más fácil la prósima vegada (Tiempu d’esploración: 4 hores).

25, 26, 27 y 28 de Xunetu de 1985.- El dia 25 suben a L.laseiru Toño y Teca cargaos con 250 m. de cuerda y carburo abondo pa dexar nel pozu, lo que fai que les mochiles seyan más pesaes de lo que son davezu.

Al otru dia atácase la cavidá con tol material disponible. Báxase’l pozu d’entrada y exploren el pequeñu pozu que nun se miró la selmana pasada. Esti pozu zarra tres 10 m. de baxada, lo que fai que s’empobinen al otru pozu. Métense dos espits na cabecera y baxa Teca col material. Dempués d’istalar un par de fracionamientos acábase la cuerda y píde-y más a Toño. Al pasala d’unu a otru un resbalón fai que la saca que tien los caberos 150 m. de cuerda caigan a lo fondero’l pozu. Esto baltia la moral de los dos exploradores y fai inevitable la vuelta a la superficie (Tiempu d’esploración: 4 hores).

El dia 27 pásenlu esperando por Javier, del C.D.U.E. San Gregorio que quedara en subir esti día con más material. Dan les 15’00 hores y como Javier nun llega camenten tornar al pozu y abrir un pasamanos p’algamar la galería per onde los primeros esploradores salieron a la paré’l Ranchón. Tres d’un par d’arriesgaos pasos lleguen a la galería y esplórenla dica una esguilada onde fai falta usar cuerda. Ye de destacar el fríu vientu que sopla pela galería, niciu claru de qu’hai una salida cimera (Tiempu d’esploración: 4 hores).

El domingu 28 alborez col cielu tapecíu y amenazando agua, lo que fai que baxemos ceo a Ricao pa escapar d’una moyadura.

Javier y Begoña, del San Gregorio, perdiéronse el sábadu y, dempués de dormir na fastera del Campu Faya, aprucieron el domingu nel Puertu Ventana.

9, 10, 11 y 12 d’Agostu de 1985.- Tres de l’obligáu paréntesis del espeleosocorru en Cantabria (un espeleólogu suizu con una pierna rota a -600 m.f.) continuamos la esploración. El xueves 9 carrétase más material dica L.l.aseiru baxu una fuerte lluvia y borrina trupa.

Al otru dia entren dos equipos. Mario, Chema y Pepe-Toño exploren la galería que sube mentantu Toño y Teca baxen el pozu grande pa recuperar el material cayío la selmana anterior y seguir la esploración. Esti equipu algama’l fondu’l pozu onde la continuación ye una pequeña galería que llévalos a la cabecera d’un pozu de 12 m., ú s’abre un meandru de grandes dimensiones que desemboca nuna grande galería. Nesti llugar ábrese otru pozu estimáu en 20 m. y que parez el techu d’una grande sala. Siguiendo pela galería baxen una pindia rampla que fina nún pozu sondiáu en 12 ó 15 m. Tornen a la boca’l pozu de 20 ya istalen tres espits pa buscar un pasu cómodu al pozu. Baxa Teca dica una repisa y sondia 10 m. más de rampla. Problemes cola lluz faen que suba y los dos camenten salir al esterior.

Mentantu, l’otru grupu esplora la grande galería que sube. Pasu ente pasu van subiendo magar que l’avance topa con serios pilancos pola grande bayura de costeros mal sofitaos. Remonten esguilando en llibre tres esguilaes y algamen l’esterior al traviés d’una pequeña cueva enriba’l Canalón de Rolamuela. La baxada pela paré dica la boca fondera ye imposible ensin cuerdes, polo que pónense a tornar pela galería, alcontrándose col otru grupu nel pasamanos. Atalántase nomar a la entrada fondera R-1 y a la cimera R-2 (Tiempu d’esploración : 6 hores).

Pela nuechi lleguen Cuco, Cuinchi y Xuan. A la mañana siguiente entren con Mario pa esplorar una galería llateral na galería cimera. P’algamar esta galería fai falta facer una trebeyosa oposición, magar que nun paga la pena yá que cierra a los pocos metros. Dibuxen lo esplorao y salen a superficie (Tiempu d’esploración: 3 hores).

Nuechi con mui mal tiempu pa baxar el llunes con una bona moyadura.

17 y 18 d’Agostu de 1985.- Roberto, Toño y Teca entren nel pozu pela nuechi’l sábadu 17. Baxen los pozos de la galería que sigue al pozu grande, cerrando a 50 m. por baxu la galería. Amurniaos, yá que parecía prometer más, suben dexando’l material nuna repisa a 20 m. de la galería. El desnivel, respeuto a R-2 ye d’alredor de 200 m. (Tiempu d’esploración: 7 hores).

23, 24 y 25 d’Agostu de 1985.- Na tarde del 23 carreténse 180 m. de cuerda más dica L.laseiru. Suben Pepo, Toño, Xuacu, Teca y Roberto. Roberto vien con un deu escayoláu por un accidente de trabayu, magar que trai la intención d’aidar lo más posible nel esterior.

El sábadu 24 alborez frio y con una borrina trupa, que, a partir d’esti dia, foi la collacia insepartable de la campaña. Xuacu esconsona con alta fiebre y fuertes dolores nel garguelu, colo que entren Toño, Teca y Pepo. Baxen rápidamente dica’l puntu onde se dexó la esploración la pasada vegada. Ente ellos van proponiendo nomes pa bautizar les estremaes partes de la cavidá. D’esta manera queden los siguientes nomes: la galería que sube y xune les dos entrades ye “La Galería Superior”, el pozu grande ye’l “Pozu Josué”, la galería siguiente nómase como “La Galería Fósil” y el pozu alcontráu nesta galería caméntase nomalu “ Pozu los Marxinaos”.

Cuando Teca va baxar esti caberu, decátase de que la cuerda ta seriamente dañada. Cámbiase por otra ya íguase la istalación pa que baxe y recueya’l material dexáu ellí la selmana pasada. Teca sube ya empobínense al otru cabu de la Galería Fósil a istalar l’otru pozu sondiáu. Faise un amarre natural y, dos metros más p’abaxu, métese trebeyosamente un fraicionamientu. Baxen y alcuentren una galería de mayores dimensiones que la Galería Fósil. Tres de 50 m. de desendolcu horizontal algamen lo que nomen “El Güevu Fritu”, guapa formación nel suelu la galería. Nesti llugar la galería sube perpindia; a los 5 m. de subida hai un pozu de 6 m. per onde desúmese l’agua que percorre la galería. Siguen subiendo y la galería enfórcase. Pepo esplora un meandru mentantu los otros dos entamen a esguilar yá que la galería verticalízase de sutrucu. Esguilen unos 40 m. dica llegar a un puntu onde fai falta l’usu d’estribos. Les dimensiones de la galería y l’airón que se siente fai-yos camentar nuna salida al esterior.

Al baxar esploren el pocín de 5 m. Ésti cai enriba una galería pindia que ruempe la tónica xeneral de la cueva poles sos pequeñes dimensiones. Dempués d’un par de pequeños pocinos y d’una rampla lleguen a la boca d’un pozu de 10 m. ú se-yos acaba’l material. Dende equí sienten un regatu correr, lo que-yo sube l’animu a los tres espeleólogos. Suben y lleguen a l’esterior al atapecer. (Tiempu d’esploración: 9 hores).

El domingu 25 entren Teca y Xuacu a coyer el material que fai falta pa dir a la Cueva Valporqueru. Mentantu ún desistala les cuerdes de la Galería Superior l’otru baxa a la Galería Fósil a la gueta de mosquetones y equipos d’espitonar, ya xúntense dempués na base’l pozu d’entrada. (Tiempu d’esploración: 3 hores).

27, 28 y 29 de Setiembre de 1985.- Dempués de la xera en Lleón y d’un par de selmanes de descansu tornamos a la faza. Como ya terminamos la cuerda estática carretamos 240 m. de cuerda dinámica que taben escaecios nel trasteru del Grupu de Montaña Gorfolí. Son dellos cachos de cuerda de más de 12 mm. de gordo que deben tener más de 10 años. Subimos pela nuechi, aportando a L.laseiru a les 5’15 de l’alborecida del sábadu 28. Dormimos un par d’hores y entramos dempués del mediudía faciendo dos equipos. Chema, Pepe-Toño y Mario intenten algamar un furacu en metá’l Pozu los Marxinaos. Pepo, Toño y Teca baxen al Güevu Fritu ya istalen el pozu donde se dexó la esploración. Nel fondu atopen tres galeríes; la primera d’elles empobina a un pozu ciegu de 20 m. de fondura. La otra galería ye una pindia rampla onde fai falta usar cuerda. Tres 20 m. de baxada algámase una sala con abondes formaciones ú abre otru pozu de 10 m. que cai enriba una sala más grande que la primera, a la qu’aporta un regatu grande. Sondien un pozu de 20 ó 25 m. al que camenten nomar Pozu Conchi. Baxen y nel fondu alcuentren otru pozu estimáu en 25 ó 30 m. Nel testeru d’esti calculen que la cota d’esploración anda pelos -300 m. de fondura, magar que nun se faen munches illusiones. Metanes de l’allegria xeneral entamen la subida llegando a superficie a les 5’30 de l’alborecia del domingu. (Tiempu d’esploración: 15 hores).

El domingu pela tarde baxamos seliquino a Bárzana onde cellebramos la fondura algamada.

11, 12 y 13 d’Ochobre de 1985.- Subimos el vienres 11, de nuechi como la vegada pasada, con 120 m. de cuerda más y con cable d’acero pa cambialo pela cuerda’l pasamanos.

En Bárzana aldericamos, ente delles botelles de sidra, si desistalamos tola cueva ó si dexamos parte pa la fin de selmana siguiente. Caún tien una opinión estremada pero a la fin pesa más la xatada d’istalar la cuerda que queda y desistalalo todo nuna nuechi. Tres de caleyar el triáu camín una vegada más llegamos a les cabañes de L.laseiru a les 5’30 de l’alborecida del sábadu 12.

Pela mañana facemos dos equipos. Pepo, Toño y Teca istalarán los 120 m. de cuerda que carretamos y dempués desitalarán lo que puedan. Roberto, Mario y Pepe-Toño y Xuacu montarán el cable del pasamanos y desistalarán lo que quede na cueva. Los primeros baxen ensin problemes dica’l Pozu Conchi. Baxu’l pozu siguiente entama una llarga y pindia rampla que baxa unos 20 ó 30 m.. No fondero d’ésta unes fáciles desesguilaes lleven a un pozu de 5 m. siguíu d’otra rampla de 30 m.. Esta rampla fina na boca d’un pozu sondiáu en 30 ó 35 m., que nun istalen yá por cansanciu. Calculen la fondura algamada en -450 m., magar que cálculos posteriores apuntaben a -420 m. de fondura. Cuando entamen a desistalar algámalos el segundu grupu. Entre todos van arrastrando’l material dica’l Güevu Fritu onde guárdase’l material en saques. Desistalamos el restu y sacamos tol material a superficie. Esto puede dar una idega del nivel qu’algamó el equipu mentantu esta campaña. (Tiempu d’esploración: 13 hores).

El domingu carretamos tolos trastes dica Ricao ( alredor de 40 kg por persona) y dende equí dica Bárzana, onde cellebramos los -400 m.f. y damos por zarrada la campaña del Branu-85.

Descripción de la cavidá

 

La entrada principal de la rede, R-1, ta allugada unos 5 m. enriba’l trave asitiáu so’l Canalón de Rolamuela. No fondero’l pozu d’entrada ábrese una grande sala allumada pola claridá l’esterior col suelu tapecíu por un trave perpindiu dica un pozu de 10 m. de fondura que recueye les sos xelaes agües. A la manzorga, y unos 3 m. penriba’l trave, ábrense los pozos que mos empobinen a la exa principal de la cueva; a la mandrecha, unos 5 m. penriba de la fin del trave, alcuéntrase la galería que mos lleva dica la entrada cimera de la rede, R-2, nomada la Galería Superior ó Galería Cimera.

La Galería Superior ó Galería Cimera.- Esta galería entama nel cabu oeste de la sala d’entrada. Un tínganu de 5 m. d’altor por 3 m. d’anchor, que ye torgáu por un saltu de 5 m., asítianos nuna sala con abondos costeros que sube per una amplia galería. Siempre subiendo, dempués d’una gran curva a la mandrecha, atopámonos con un enanchón de la galería; a la manzorga alcuéntrase una esguilada de 10 m., qu’una vuelta arriba asítianos n’otra galería que sube con grandes costeros en suelu. Dempués de 50 m. de percorríu aportamos a una chimenea de grandes dimensiones que, a la manzorga, tien otra esguilada de 3 m. Enriba apruz una espaciosa galería ascendente. Esta da una gran curva a la manzorga y sigue subiendo cada vuelta más pindia dica llegar a una sala. Otra esguilada de 15 m. colócanos n’otra sala onde entama una galería. Siguiendo esta galería atopámonos con una difícil chimenea de 6 m. que, tres d’esguilala, asítianos nuna galería onde se ve la lluz del esterior. A la fín d’ésta, ábrese R-2. Esta cueva ta allugada enriba d’unes parés bien trebeyoses d’esguilar na fastera norte’l Ranchón. El desnivel con respeutu a R-1 ye d’alredor de 100 m.

Dende’l Pozu Josué dica l’entamu de la Galería Fósil.- A la manzorga de la sala d’entrada ábrese’l Pozu Josué. Esti pozu, magar que tien dalgún estrenchón al entamu, ye de dimensiones afayadices. Nel primer tramu, hai que poner munchu procuru poles abondes cayíes de costeros. Dempués d’esti peligrosu cachu, aportamos a una ponte de piedra que sírvenos de fracionamientu. A partir d’esti llugar el pozu garra grandes proporciones, llegando a camudase nún voláu. No fondero’l pozu atopamos una sala onde s’amesten dellos pozos paralelos y ú la continuación ye una pequeña galería que comunica con una sala d’amenorgaes dimensiones. Nel cabu, un curtiu pasaxe llévanos a un pozu de 12 m, so’l qu’entama una galería de meandru que desemboca nel entamu la Galería Fósil. A la manzorga ábrese esa mesma Galería Fósil y, enfrente, el Pozu los Marxinaos.

El Pozu los Marxinaos.- Esti pozu entama nuna estrencha resquiebra que darréu enancha dica camudase nún voláu de 20 m. A la metá’l voláu, nún furacón na paré, ábrese una sala que comunica colo fondero’l pozu. Baxando’l voláu llegamos a una repisa afayadiza seguida d’un pozu de 15 m. Mentantu la baxada apréciense dellos ramales ascendentes que comuniquen cola sala nomada enantes. So’l pozu de 15 m. entama un pasaxe siguíu de dos saltos de 3 m. que cayen enriba una sala per onde l’agua desúmese por filtración.

La Galería Fósil.- A la manzorga’l Pozu los Marxinaos abre una espaciosa galería que baxa. Siguiendo esta galería llegamos a un pozu de 15 m. que nel testeru tien un aporte d’agua que cai pel saltu. La enorme galería que s’abre baxo esti pozu medirá unos 50 m.; nella hai qu’esquivar los pesaos costeros qu’ellí xacen ente los que se formen dellos gours con agua abondo. A la fin aportamos a un furacu onde la galería entama a subir. A los pocos metros, nel suelu, atopámonos con una rara formación, el Güevu Fritu, que recibe esti nome pola so forma y les aportaciones de ferruñu que lu recubren. Tres d’esguilar dellos metros atopámonos con un pocín de 5 m. baxo’l qu’entamen les ramples que lleven al Pozu Conchi. A partir del testeru d’esti pozacu de 5 m., la galería tórnase más pindia, tresformándose nuna serie continuada de pequeñes esguilaes y na qu’hai de destacar un fuerte airón.

Ramples que van al Pozu Conchi.- Perbaxu esi mesmu pozu de 5 m., tenemos que baxar 10 m. en rampla p’atopar un incómodu estrenchón pel qu’aportamos a otru pequeñu pozu. Al final d’ésti una vertical asítianos nun llugar guapamente concreicionáu y con abondes estalactites encarnaes. Nesti puntu, ábrense tres ramales: una d’elles lleva a una estrencha gatera enriba un pozu; otra ye un pozu de 20 m. ciegu; y la tercer ye una rampla perguapa que, tres de 30 m. de baxada, llévanos a una sala ú la continuación ye un pozu de 10 m. No fondero d’esti pozu alcuéntrase’l Pozu Conchi, anchu tubu de 25 m. pel que cai un tobayón enforma molestu pa los esploradores.

Del Pozu Conchi a la cota -420.- No fondero’l Pozu Conchi, un curtiu pasu de techu baxu empobínanos al testeru d’un pozu de 30 m. instaláu con 4 fraicionamientos, pues equí la roca ye muy cortante y podríe mancar la cuerda. A la fin del pozu continuamos per una galería en rampla que cada vuelta arímase más a la vertical. Baxando esta nueva rampla que tien el suelu de rellenu químicu, aportamos a una cómoda galería interrumpida por un saltu de 3 m. que mos alluga nel entamu d’un nuevu pozu de 10 m.. Les parés de colada camúdense en roca vivo y llavao. La bayura d’agua que s’agüeya equí ye muncho mayor que nel Pozu Conchi, lo que forma un suelu de sable, trito y piedres. La galería baxa dica llegar a un furacu onde desúmense los estremaos regatos d’agua; penriba d’elli, sigue la vía principal enriba d’un peligrosu y falsu suelu. Equí, abre un gran pozu sondiáu en 30 ó 35 m. y la galería medra de manera ablucante.

Nesti llugar, metanes d’Ochobre de 1985, foi abandonada la esploración tres d’algamar la cota de -420 m.f. con respeutu a R-2.

Andechiegos

 

Sección d’Espeleoloxia del Grupo de Montaña Gorfolí

Florentino Medina Balbuena (Cuco)

José Luis Alvarez López (Cuinchi)

Juan José Garcia (Xuan)

Manuel Fernandez Montero

Maite Garcia Herrero

Roberto Romero Menendez (Tito)

Pilar Solanas López

José Antonio Carrasco Barroso (Pepe Toño)

José Maria López Alvarez (Chema)

Juan Carlos Garcia Fernandez (Renfes)

Jorge Luis Agüero Juan

José Manuel Fernandez Arrais (Pepo)

Luis Fernando Martín Rodriguez

Xesús F. Manteca Fraile (Teca)

Seición d’Espeleoloxia de l’Asociación Montañera Astur Torrecerredo

Antonio Barrientos Garcia-Arroyo (Toñin la Vieya)

Joaquin Menendez Vallejo (Xuacu)

Mario Larrea Poladura

Club Deportivu Espeleolóxicu San Gregorio

Begoña Bujanda de la Fuente

Jesús Javier Lusarreta Fernandez (Fanjul)


Considerances finales

 

Pa baxar dende R-1 dica la cota -420 m.f. usáronse 400 m. de cuerda estática y 250 m. de cuerda dinámica. Dao que los medios de los grupos participantes yeren escosos, fizo falta usar esos 250 m. de cuerda d’esguilar, asina como cuerdes perfrayaes que faíen de dalgunos llugares zones de verdaderu riesgu. Magar d’esto y de les zunes del Presidente de la Federación Asturiana d’Espeleoloxía, que fizo tolo dable por torgar estos trabayos y mirar de meter a machamartiellu a la so xentecaya nesta esploración, la ilusión y el puxu del equipu formáu foi quién p’algamar la cota –420 m. y facer avanzar un pasu más a la espeleoloxía asturiana.

La Rede R-1/R-2 tien perbones perspeutives d’algamar el gran ríu soterrañu qu’alimenta les surdencies de Los Garrafes, asitiaes 700 m. perbaxu de R-1, asina como tener entraes penriba de la R-2.

enlace con la página espeleoastur.as