El Grupu d'Espeleoloxia Gorfolí costituyose como tal nel mes de setiembre de 1985. Enantes d'esta fecha fuimos Sección d'Espeleoloxia del Grupo de Montaña Gorfolí. Los antecedentes tresmanénse nos caberos años 60 y primeros años 70, cuando montañeros, anónimos pa nos, entamen a visitar cueves nos conceyos cercanos a Avilés y a les cueves güei consideraes clásiques d'Asturies. Nos caberos años 70, Jorge Luis Agüero Juan y Jose Maria Lopez Alvarez (Chema, Chemona) organicen en serio la sección d'espeleoloxia, contautando colo qu'entós yera el Comite Noroeste d'Espeleoloxia. En 1982, tres la desparición temporiega de la Sección d'Espeleoloxia de la Fundación Pública Cultural y Deportiva de Castrillón, xuntense a los espeleólogos del Gorfolí delles persones procedentes del conceyu vecín.

Son estos años l'entamu de una de les époques doraes de la Espeleoloxia Asturiana. La formación de la Federación Noroeste d'Espeleoloxia y posteriormente de la Federación Asturiana, asina como los resultaos algamaos en Picos d'Europa peles diverses espediciones, tray consigo un espoxigue de los espeleólogos asturianos y, por amestura, de los del Gorfolí en particular. Durante esta etapa participamos na esploración de delles cavidades col Colectivo Asturiano de Espeleólogos. Pozu la Val.l.ina'l Corru (-220 m.f.), Pozu la Carba (-361 m.f.), Gralleros de Salinas (-316 m.f.), además de bayura d'otres pequeñes cavidaes faennos garrar esperiencia ya intentar marcanos otros oxetivos. Tamién son años de crecer a nivel personal y de decatanos poco a poco que'l nuesu puestu dientro'l CADE ye'l de borriquinos de carga de la Elite de la espeleoloxia. Los trabayos del Gorfolí fuera del CADE son piquiñinos, como nos, pero camentamos que importantes. El llabor del Catálogu de Cavidaes del Conceyu Candamu, l'entamu del trabayu sistemáticu na Rede de Veigadonga (Yernes ya Tameza) marquen unos fitos na nuestra hestoria.

En 1984 la renacia Agrupación Deportiva Espelelóxica de Castrillón quitanos la fastera de trabayu de Veigadonga col total sofitu de J.J. Gonzalez Suarez, ya d'aquella presidente de los espeleólogos asturianos. El Gorfolí queda ensin fastera de trabayu durante un añu, viendo les sos salides al monte llendaes peles xeres del CADE.

Na primavera de 1985 tres espelólogos del Gorfolí atopen un pozu na fastera Este del Ranchón, nel Conceyu Quirós. Esta cavidá ye'l Pozu'l Trabe Rolamuela y sedrá la quiebra durante más tres años cola Federación Asturiana d'Espeleoloxia, al tratar d'imponer JJGS l'actuación del CADE n'esta cavidá. Seis años de trabayu n'esti pozu trayerán como premiu algamar dos vegaes más de 600 m. de fondura fasta llegar a la fastera somorguiada de la peña. Además, los llabores de gueta de cavidaes na fastera cimera del macizu amestarán al catalugu más de 200 nueves cavidaes, algunes d'elles de fondura reseñable. Les rellaciones cola FASE vuelven a entamase cuando esta necesita en dellos rescates a xente del Grupu d'Espeleoloxia Gorfolí. Entámase una nueva etapa d'andecha col CADE.

En 1993 entamamos la esploración de delles cavidaes nel escar del Monte Redes (Conceyu Casu). Equí destaca, ente otres, la Rede la Canal Fuerte, con 2.200 m. de galeries y -220 m. de fondura.

1994 da un guelpe de timón a la xera del G.E.Gorfolí. Un par de chiflaos interesense pel espeleomerguyu. Intentense contautos colos Ayatollahs del espeleobuceo español pero nun sacamos nada en claro. Cola FASE nun se puede contar. Alundense a coses como l'acidente de Derek Trignam y dexen les coses clares: Mientras yo sea presidente aqui no va hacer espeleobuceo ni dios. Frase llabaniega que inda remembramos. Dempués de dar muncho la coña na FASE conseguimos un contaútu cola Espedición Cave Diving Group Asturies '94. Nun son como los españoles. Darreu ufierten-nos merguyar con ellos y andechar en prósimes espediciones. Esto ye l'entamu del espeleomerguyu asturianu. Naz l'Ensame Aguarón, una andecha d'espeleólogos asturianos y cántabros de estremaos grupos d'espeleoloxia interesaos nel espeleomerguyu. Y asina van faciendose les primeres esploraciones, a destacar, n'estos años siguientes, Fonte Obaya, na Xerra'l Sueve, con más de 250 m. de desendolcu y 40 m. de fondura.

Nel 1996 damos el saltu a Picos d'Europa, esplorando delles surdencies en El Cornión. Los Güeyos del H.ungumia y los Güeyos de la Texa son exploraos durante los branos del 96 y 97, algamando nos caberos 300 m. de nueves galeries dempués de merguyar 3 sifones. Dalgunos miembros del grupu participen na esploracion de Torca Castil (-1.020) y otres cavidaes na fastera Tortorios-Peña Castil-H.oos del Carnizosu xunto col CADE y los grupos cántabros La Lastrilla y Lenar.

Na primavera de 1997 faense los primeros merguyos nel Güeyu Deva, cavidá que col pasu de los años y les esploraciones siguientes camudarase de dalgo onde nun hebia nada n'una cavida de más de 1 km. de desendolcu y más de una decena de sifones trespasaos.

1999 trayinos un averamientu a espeleomerguyadores d'otres fasteres del Estau Español. Andechamos con ellos na esploración del segundu sifón de la Fuentona de Muriel (Soria), onde fai poques selmanes (el 30 de Xunu y el 1 de Xunetu de 2001) algamaronse los 100 m. de fondura nel segundu sifón. Los puntonas foron Angel Ortego y Miguel Romans, sofitaos per un fuerte equipu d'espeleomerguyadores. Ye nidio que n'esta xera tamos d'aprendices pero tamién-y dimos un puxu piquiñín al llabor d'algamar esta fondura'n merguyos anteriores. Tamién seguimos cola andecha colos británicos y catalanes del S.I.E. na esploración de sifones en Picos, concretamente na Cueva l'Agua de Culiembru. En setiembre del 2000, Rick Stanton trespasó n'esta cueva el que pa los ingleses yera The Sump of the Glory, pero nun llogró algamar les deseyaes galeries del Pozu'l H.itu. Pola nuesa parte, retomamos la esploración de la Cueva de l'Oyu la Madre, ú sacrificamos el branu del 2000 esplorando dalgo ya esplorao pelos nuestros collacios ingleses. El remanecimientu de la información por parte de la FASE fizonos perder tol branu. Per otru llau, el 2000 foi un bon añu ya que dos miembros del Ensame Aguarón participaron en espediciones internacionales tales como la de la Federación Francesa de Espeleologia "Ultima Patagonia" y la de la productora Al Filo de lo Imposible a Cuba "Mogotes 2000".

Pero'l trabayu'n Picos d'Europa ye dalgo del pasau. Esti añu, a fecha 17 de Xunetu de 2001, tamos obligaos a esplorar fuera de les llendes del Parque Nacional porque la FASE o la FEE (dos persones nún mesmu ser) nun tramitó inda los permisos d'esploración ente la dirección del parque. Pero lo que ye una torga camudose en perbonos resultaos no esplorao n'otros llugares d'Asturies dende l'inviernu. La H.uenti'l Cuélebre (200/-53), El Mexón y lo que escuende la mesma llende'l parque solo tan esperando'l final del branu pa dar los resultaos definitivos d'esta campaña. Va seguir.

   

 

www.espeleoastur.as