NOTES TOPONÍMIQUES: ADDENDA A LOS NOMES XENÉRICOS DE DEPRESIONES Y CAVIDAES NATURALES N’ASTURIES

 

Xosé Lluis del Río.

Grupu d’Espeleoloxía Gorfolí - Asturies

 

1. Entamu.

 

Hai yá tiempu que presentamos una comunicación so esta tema al Vº Congreso Español de Espeleología, celebráu en Santander nel añu 1990. Nella, nun pretendíemos namái que llamar l'atención de la xente de fuera que fai esploraciones espeleolóxi­ques n'Asturies, pa que vieren la necesidá de respetar el patrimoniu cultural asturianu (y tamién, per estensión, el de cualisquier otru llugar nel que se tea esplorando), respetan­do la toponimia.

 

Apuntábemos yá nesa comunicación una bona ristra nomes xenéricos de depresiones y cavidaes naturales. Pero la fuerza espresiva d'una llingua ye siempres sor­pren­dente y nel casu l'asturianu (una llingua minorizada), l'afayu de nueves espre­siones so la tema que mos ocupa, amás de sor­pren­dente, préstanos el doble; en primer llugar, porque ello indícamos que los espeleólo­gos asturianos en xeneral son yá coscientes de l'impor­tancia d'esta tema; y, en segundu llu­gar, porque la recupera­ción d'esos nomes va permi­tinos calte­nelos vivos.

 

Ye por ello polo que quixéremos que fuera dende equí el nuesu más vivu agradecimientu a tolos collacios que fixeron posible esti reblaguín nel respetu y caltenimientu de la nuesa cultura y de la nuesa llingua.

 

2. Nomes xenéricos de cavidaes naturales.

 

* Aviru.- Nel Conceyu Morcín (na fastera'l Monsacro), abe­llu­gu natural resultante d'un bloque caliar sometíu a los efeutos de la karstificación. Hai nesti monte abondos d'ellos, reco­yíos per J. Fernández Conde y M. Santos del Valle: Aviru les Sábanes, Aviru'l Picu Llenu Vellar o Aviru Salón, Aviru Rutu, Aviriquín Calienti, Aviru los Soldaos.

 

* Berón.- Nel Conceyu d'Ayer, abellugu natural.

 

* Llerza.- Nel Conceyu Ponga, "pozu": Llerza de Vallellam­pos. Esti términu signifi­ca, polo xeneral, miéu, pánicu; y tamién se noma asina a un ser fantásticu col que s'asusta a los neños; cola variante mascu­lina "llerciu", nómase'n xeneral a un furacu pequeñu pente les peñes. De l'aceición que mos ocupa (=pozu), deriva'l verbu "llerzar", que designa l'ai­ción de cayer o cayese daqué o daquién a la llerza (exemplu: "llerzóse la yegua").

 

* Rasqueta.- Nel Conceyu Teberga (Puertu las Navariegas), resquiebra perfonda na peña. El términu "rasquetón" noma al pasu estrechu pente dos xerres.

 

* Tayeru.- Nel Conceyu Morcín, "pozu".

 

 

3. Bibliografía.

 

- Fernández Conde, J. y Santos del Valle, M. "Toponimia y tradiciones del Monsacro". Lletres Asturianes. Nº 23. pp. 99-112. Uviéu, marzu 1987.

 

- Río Fernández, José Luis del. "Toponimia del medio kárs­tico en Asturias". Actas del IIº Congreso Asturiano de Espe­leología. Federación Asturiana de Espeleología. Uviéu, 1988.

 

- Río Fernández, José Luis del. "Algunos nombres genéricos de depresiones y cavidades naturales en Asturias", Actas del Vº Congreso Español de Espeleología, pp. 201-207. Federación Cántabra de Espeleología. Santander, 1992.