A PROPOSITU DE "EL POZU PISPIRON" Y OTRES CAVIDAES TEBERGANES

 

 

Xosé Lluis del Río

Grupu d’Espeleoloxía Gorfolí – Asturies

 

 

Nestes caberes dómines, paez que tornó mirase pa El Pozu Pispirón (mal nomau pelos espeleólogos "Pozo del Pispillón" o mesmamente "Pozu'l Pispillón") comu pozu escuela ideal, al pie de la Pena Sobia, en Teberga.

 

Esti fechu y el haber asoleyáu nos caberos númberos del Filtraciones dellos artículos nos que se facía referencia a esti pozu, asina como la so topografía (recoyéndolu con un  nome que nun ye'l de verdá), moviónos pa asoleyar esti comentariu col que miramos de facer xusticia.

 

Pero, amás desti  El Pozu Pispirón,  hai otros munchos llugares perinteresantes pa nós en Teberga.

 

Nesti sen, ye de destacar delles referencies a "pozos" que  fai  Xose  Lluis García Arias nel so trabayu so la toponimia tebergana: "De toponimia tebergana: (X), Hidrotoponimia. Asoleyáu nel númberu 30 de la revista "Lletres Asturianes", Uviéu.

 

Y anque los nomes de llugar recoyíos pol autor baxo la mesma espresión "pozu" representen realidaes enforma estremaes, en dellos casos trátase d'un pozu fondu, que ye lo que a nós más mos interesa. Tolos nomes deriven del Llatín "PUTEUM". Asina, recueye ente otros:

 

- El Pozu'l Ministeriu:en S.Salvador, xunto a los praos de San Vicente.

 

-  El Pozu'l Tubu:  ye ún de los llugares onde apaez el ríu que baxa de Parmu, dempués de sumise; esti pozu ta a la vera Cueva Güerta.

 

- El Pozu Secu: en  Marabiu; ye un pozu de grandes dimensiones; estrémase de El Pozu L’Agua, que ta a la so vera.

 

- El Pozu la Caldeirina: en Fresnéu.

 

- Los Pozos: en Fresnéu.

 

-Pozaracheiros: llugar con munchos pozos en Fresnéu.

 

- El Pozu Val Gal.lineiru: en Presorias (Valdesampedru) nel llugar llamáu Val Gal.lineiru.

 

- Pozu las Grachas:  pozu onde se meten  las  grachas, faciendo un ruíu  pergrande. En Prau.

 

- Pozu Gracheiru: en Taxa nel métense las grachas.

 

- Pozu Calvín: na llende Campiel.lu y Taxa.

 

- El Pozu la Casareta: en Campos;  hubo un casetu nel llugar.

 

-El Pozu Mansu: en Redral; dicen que se fexo esti pozu dempués d'una quema'l pueblu.

 

- El Pozu Montoutu: pozu mui fondu, en Torce.

 

- El Pozu la Osa: en Vil.lanueva.

 

 

- El Pozu la Nieve: en Fos de la Yegua (Marabiu); baxaben a él a por  nieve cuando de branu facía falta pa delles enfermedaes.

 

- El Pozu la Pirina: en Prau; emplegábase pa regar.

 

- El Pozu Pispirón: gran pozu, peligrosu, al pie de la Pena Sobia.

 

- El Pozu'l Pládanu: en Campiel.lu.

 

- El Pozu Rudrigu: en Fos de la Yegua, a la vera'l Pozu la Nieve.

 

- El Pozu San Fernandu: en Vil.lanueva.

 

- El Pozu los Sapos: en Santamarta, (Valdecarzana); nel llugar hai carbayos pergrandes.

 

- El Pozu sol Veiru: n'Urria.

 

- El Pozu la Xubida: pozu mui fondu, en Prau.